Pramāṇa · Search · About · API

Tritiyaskandha 4

Tṛtīyaskandha 4

Language
Sanskrit

4.1

uddhava uvāca || atha te tadanujñātā bhuktvā pītvā ca vāruṇīm || tayā viśraṃśitajñānā duruktairmarma paspṛśuḥ

4.2

teṣāṃ maireyadoṣeṇa viṣamīkṛtacetasām || nimlocati ravāvāsīdveṇūnāmiva mardanam

4.3

bhagavān svātmamāyāyā gatiṃ tāmavalokya saḥ || sarasvatīmupaspṛśya vṛkṣamūlamupāviśat

4.4

ahaṃ prokto bhagavatā prapannārtihareṇa ha || badarīṃ tvaṃ prayāhīti svakulaṃ saṃjihīrṣuṇā

4.5

athāpi tadabhipretaṃ jānannahamarindama || pṛṣṭhato'nvagamaṃ bhartuḥ padāviśleṣaṇākṣamaḥ

4.6

adrākṣamekamāsīnaṃ vicinvan dayitaṃ patim || śrīniketaṃ sarasvatyāṃ kṛtaketamaketanam

4.7

śyāmāvadātaṃ virajaṃ praśāntāruṇalocanam || dorbhicaturbhirviditaṃ pītakauśāmbareṇa ca

4.8

vāma ūrāvadhiśritya dakṣiṇāṅghrisaroruham
apāśritārbhakāśvatthamakṛśaṃ tyaktapippalam

4.9

tasmin mahābhāgavato dvaipāyanasuhṛtsakhaḥ || lokānanucaran siddha āsasāda yadṛcchayā

4.10

tasyānuraktasya munermukundaḥ pramodabhāvā''natakandharasya || āśṛṇvato māmanurāgahāsasamīkṣayā viśramayannuvāca

4.11

śrībhagavānuvāca
vedāhamantarmanasīpsitaṃ te dadāmi yat tadduuravāpamanyaiḥ || satre purā viśvasṛjāṃ vasūnāṃ matsiddhikāmena vaso tvayeṣṭaḥ

4.12

sa eṣa sādho caramo
bhavānāmāsāditaste madanugraho yat || yanmāṃ nṛlokān raha utsṛjantaṃ diṣṭyā dadṛśvān viśadānuvṛttyā

4.13

purā mayā proktamajāya nābhye padme
niṣaṇṇāya mamādisarge || jñānaṃ paraṃ manmahimāvabhāsaṃ yat sūrayo bhāgavataṃ vadanti

4.14

ityādṛtoktaḥ paramasya puṃsaḥ pratikṣaṇānugrahabhājano'ham || snehottharomāskhalitākṣarastaṃ muñcan śucaḥ prāñjalirababhāṣe

4.15

ko nvīśa te pādasrojabhājāṃ sudurlabho'rtheṣu caturṣvapīha || tathāpi nāhaṃ
pravṛṇomi bhūman bhavatpadāmbhojaniṣevaṇotsukaḥ

4.16

karmāpyanīhasya bhavo'bhavasya te durgāśrayo'thāribhayāt palāyanam || kālātmano yat pramadāyutāśrayaḥ svātman rateḥ khidyati dhīrvidāmiha

4.17

mantreṣu māṃ vā upahūya yat tvamakuṇṭhitākhaṇḍasadātmabodhaḥ | pṛccheḥ prabho mugdha ivāpramattastanno mano mohayatīva deva

4.18

jñānaṃ paraṃ svātmarahaḥ prakāśaṃ provāca kasmai bhagavān samagram || api kṣamaṃ no grahaṇāya bharttarvadāñjasā yad
vṛjinaṃ tarema

4.19

ityāveditahārdāya mahyaṃ sa bhagavān paraḥ || ādideśāravindākṣa ātmanaḥ paramāṃ sthitim

4.20

sa evamārādhitapādatīrthādadhītatattvātmavibodhamārgaḥ || praṇamya pādau parivṛtya devamihāgato'haṃ virahāturātmā

4.21

so'haṃ taddarśanāhlādaviyogātiyutaḥ prabho
gamiṣye dayitaṃ tasya vadaryāśramamaṇḍalam

4.22

yatra nārāyaṇo devo naraśca bhagavānṛṣiḥ || mṛdu tīvraṃ tapo dīrghaṃ tepāte lokabhāvanau

4.23

śrīśuka uvāca || ityuddhavādupākarṇya suhṛdāṃ duḥsahaṃ vadham || jñānenāśamayat kṣattā śokamatpatitaṃ budhaḥ

4.24

sa taṃ mahābhāgavataṃ vrajantaṃ
kauravarṣabhaḥ || viśrambhādabhyadhattaidaṃ mukhyaṃ kṛṣṇaparigrahe

4.25

vidura uvāca || jñānaṃ paraṃ svātmarahaḥ prakāśaṃ yadāha yogeśvara īśvaraste || vaktuṃ bhavān
no'rhati yaddhi viṣṇorbhṛtyāḥ svabhṛtyārthakṛtaśvaranti

4.26

uddhava uvāca || nanu te tattvasaṃrādhya ṛṣiḥ kauṣāravo'ntime || sākṣāt bhagavatā''diṣṭo
martyalokaṃ jihāsatā

4.27

śrīśuka uvāca || iti saha vidureṇa viśvamūrterguṇakathayā sudhayā plāvitorutāpaḥ || kṣaṇamiva puline yamasvasustāṃ
samuṣita aupagavirniśāṃ tato'gāt

4.28

rājovāca || nidhanamupagateṣu vṛṣṇibhojeṣvadhirathayūthapayūthapeṣu mukhyaḥ || sa tu kathamavaśiṣṭa uddhavo
yad harirapi tatyaja ākṛtiṃ tryadhīśaḥ

4.29

śrīśuka uvāca || brahmaśāpāpadeśena kālenāmoghavāñchitaḥ || saṃhṛtya svakulaṃ nūnaṃ tyakṣyan dehamacintayat

4.30

asmāllokāduparate mayi jñānaṃ madāśrayam || arhatyuddhava evāddhā saṃpratyātmavatāṃ varaḥ

4.31

noddhavo'ṇvapi mannyūno yadguṇairnāditaḥ prabhuḥ || ato maṅguyanaṃ lokaṃ grāhayanniha tiṣṭhatu

4.32

evaṃ trilokaguruṇā saṃdiṣṭaḥ śabdayoninā || badaryāśramamāsādya harimīje samādhinā

4.33

viduge'pyuddhavācchrutvā kṛṣṇasya paramātmanaḥ || krīḍayopāttadehasya karmāṇi ślāghitāni ca

4.34

dehanyāsaṃ ca tasyaivaṃ dhīrāṇāṃ
dhairyavardhanam || anyeṣāṃ duṣkarataraṃ paśūnāṃ viklavātmanām

4.35

ātmānaṃ ca kuruśreṣṭha kṛṣṇena manasekṣitam || dhyāyan gate bhāgavate ruroda premavihvalaḥ

4.36

kālindyāḥ katibhiḥ siddha ahodhirabharatarṣabhaḥ || prāpadyata svaḥsaritaṃ yatra mitrāsuto muniḥ

Linked texts (6)