Varahapurana 104.18

104.18

atha kṣīradhenudānavidhiḥ ..
hotovāca ..
kṣīradhenuṃ pravakṣyāmi tāṃ nibodha narādhipa ..
anulipte mahīpṛṣṭhe gomayena nṛpottama ..1 ..
gocarmamātramānena kuśānāstīrya sarvataḥ ..
tasyopari mahārāja nyasetkṛṣṇājinaṃ budhaḥ ..2..
tatra kṛtvā kuṇḍalikāṃ gomayena suvistṛtām ..
kṣīrakumbhaṃ tataḥ sthāpya caturthāṃśena vatsakam ..3..
suvarṇamukhaśṛṅgāṇi candanāgurukāṇi ca ..
praśastapatraśravaṇāṃ tilapātropari nyaset ..4..
mukhaṃ guḍamayaṃ tasyā jihvāṃ śarkarayā tathā ..
phalapraśastadaśanāṃ muktāphalamayekṣaṇām ..9..
ikṣupādāṃ darbharomāṃ sitakambalasaṃvṛtām ..
tāmrapṛṣṭhāṃ kāṃsyadohāṃ paṭṭasūtramayīṃ śubhām..6..
pucchaṃ ca nṛpaśārdūla navanītamayastanīm..
svarṇaśṛṅgīṃ raupyakhurāṃ pañcaratnasamanvitām ..7..
catvāri tilapātrāṇi caturdikṣvapi vinyaset ..
saptadhānyayutaṃ pātre dikṣu dikṣu ca vinyaset ..8 ..
evaṃ lakṣaṇasaṃyuktāṃ kṣīradhenuṃ prakalpayet ..
ācchādya vastrayugmena gandhapuṣpaiḥ samarcayet .. 9 ..
dhūpadīpādikaṃ kṛtvā brāhmaṇāya nivedayet ..
vastrādibhiralaṃkṛtya mudrikākarṇakuṇḍalaiḥ ..105.10 ..
pādukopānahau chatraṃ dattvā dānaṃ samarpayet ..
dadyādanena mantreṇa kṣīradhenuṃ prayatnataḥ ..11..
āpyāyasveti mantreṇa vedoktena vidhānataḥ ..
āśrayaḥ sarvabhūtānāmityādi narapuṅgava..12..
āpyāyasveti mantreṇa kṣīradhenuṃ prasādayet ..
pratigrāhī paṭhenmantrameṣa dānavidhiḥ smṛtaḥ ..13..
dīyamānāṃ prapaśyanti te yānti paramāṃ gatim ..
etāṃ hemasahasreṇa śatenātha svaśaktitaḥ..14..
datvā dhenuṃ mahārāja śṛṇu tasyāpi yatphalam ..
ṣaṣṭivarṣasahasraṃ tu indraloke mahīyate..15..
pitrādibhiśca sahito brahmaṇo bhavanaṃ vrajet ..
divyaṃ vimānamārūḍho divyasraganulepanaḥ ..16..
krīḍitvā suciraṃ kālaṃ viṣṇulokaṃ sa gacchati ..
dvādaśādityasaṃkāśe vimānavaramaṇḍite .. 17 ..
gītavāditranirghoṣairapsarobhiśca sevite ..
tatroṣya viṣṇorbhavane viṣṇusāyujyamāpnuyāt ..18.