Varahapurana 108.1

108.1

atha kārpāsadhenudānamāhātmyam ..
hotovāca ..
athātaḥ sampravakṣyāmi dhenuṃ kārpāsakīṃ nṛpa ..
yatpradānānnaro yāti aindralokamanuttam .. 1 ..
viṣuve tvayane puṇye yugādigrahaṇe tathā ..
grahapīḍāsu cogrāsu duḥsvapne'riṣṭadarśane .. 2 ..
nṛṇāṃ ca grahapīḍāsu duḥsvapnādbhutadarśane ..
puṇyeṣvāyatane rājañchucideśe gavāṃ gaṇe .. 3 ..
gomayenopaliptāyāṃ darbhānāstīrya vai tilān ..
tanmadhye sthāpayeddhenuṃ vastramālyānulepanām .. 4 ..
dhūpadīpādinaivedyaiḥ pūjayecca vimatsaraḥ ..
uttamā ca caturbhārairarddhenaiva tu madhyamā .. 5 ..
bhāreṇa cādhamā proktā vittaśāṭhyaṃ vivarjayet ..
caturthāṃśena vatsaṃ tu kalpayitvā vidhānataḥ. 6 ..
karttavyā rukmaśṛṅgī tu rajatasya khurānvitā ..
nānāphalamayā dantā ratnagarbhasamanvitāḥ ..7..
ityevaṃ sarvasampūrṇā kṛtvā śraddhāsamanvitaḥ ..
āvāhayettāṃ kārpāsadhenuṃ mantrairdvijātaye .. 8..
dadyāddhenuṃ carmapāṇiḥ prayataḥ śraddhayānvitaḥ ..
pūrvoktastu vidhiḥ kāryo dānamantrapurasaraḥ .. 9 ..
yayā devagaṇaḥ sarvastvayā hīno na varttate ..
tathā uddhara māṃ devi pāhi saṃsārasāgarāt .. 109.10 ..
iti śrīvarāhapurāṇe śvetavinītāśvopākhyāne kārpāsadhenudānamāhātmyaṃ nāma navādhikaśatatamo'dhyāyaḥ ..109..