Varahapurana 67.1

67.1

bhadrāśva uvāca .
bhagavan sitakṛṣṇe dve bhinne jagati keśavān .
striyau babhūvatuḥ ke dve sitakṛṣṇā ca kā śubhā .. 67.1 ..
kaścāsau puruṣo brahman ya ekaḥ saptadhā bhavet .
ko'sau dvādaśadhā vipra dvidehaḥ ṣaṭśirāḥ śubhaḥ .. 67.2 ..
dampatyaṃ ca dvijaśreṣṭha kṛtasūryodayādanam .
kasmādetajjagadidaṃ vitataṃ dvijasattama .. 67.3 ..
agastya uvāca .
sitakṛṣṇe striyau ye te te bhaginyau prakīrtite .
satyāsatye dvivarṇā ca nārī rātrirudāhṛtā .. 67.4 ..
yaḥ pumān saptadhā jāta eko bhūtvā nareśvara .
sa samudrastu vijñeyaḥ saptadhaiko vyavasthitaḥ .. 67.5 ..
yo'sau dvādaśadhā rājan dvidehaḥ ṣaṭśirāḥ prabhuḥ .
saṃvatsaraḥ sa vijñeyaḥ śarīre dve gatī smṛte .
ṛtavaḥ ṣaṭ ca vaktrāṇi eṣa saṃvatsaraḥ smṛtaḥ .. 67.6 ..
dampatyaṃ tadahorātraṃ sūryācandramasau tataḥ .
tato jagat samuttasthau devasyāsya nṛpottama .. 67.7 ..
sa viṣṇuḥ paramo devo vijñeyo nṛpasattama .
na ca vedakriyāhīnaḥ paśyate parameśvaram .. 67.8 ..
.. iti varāhapurāṇe bhagavacchāstre saptaṣaṣṭitamo'dhyāyaḥ .. 67 ..