Vishnupurana 98.58

98.58

karmopādhikanāmarūpavyākaraṇāviṣayatvena jīvavatsurapaśumanujādikalpanā netyāha-na yatreti || śabdajātiguṇakriyādravyairvastuno viśeṣaṇaṃ kalpanā | ākāśo ha vai nāmarūpayornirvahitā te yadantarā tadbrahma iti śrutiḥ | te-nāmarūpe | antarā-nāmarūpāspṛṣṭaṃ yat tadbrahmeti |
tathāpi jagadupakārāyopāsakānugrahāya ca svecchāgṛhītadevāvividhasvarūpanāmā brahmādimistattannāmabhiḥ stūyasa ityāha-na kalpanāmiti || kṛṣṇādināmagrahaṇaṃ bhagavadavatārādiṣvanyeṣāmapi nāmnāmupalakṣaṇam | mokṣadharme caturmukhasyāniruddhopāsanamuktam yasyāvatārarūpāṇi samarcanti divaukasaḥ iti cāsmin purāṇe |
sarvārthā iti || yairetairdevāyairvikalpanābhūtairarthairviśvaṃ bhavati te sarvārthāstvaṃ vikārahīnametadātmavastu ca tvam | ato viśvātmā tvamiti sarvasmin bhavato'nyanna kiṃcidastīti yojanā |
tvaṃ brahmeti || bhinnārthaiḥ - bhinnakāryaiḥ | śaktibhedaiḥ-brahmādirūpabhedaiḥ |
viśvamiti || sūryagabhastirūpo bhūtvā vṛṣṭidvārā viśvaṃ sṛjati | prapañcaśca te śeṣabhūtaḥ | saditi padaṃ yasya vācakaṃ tatsaditi vācakam | akṣaraṃ yatparaṃ rūpam- oṃ tatsaditi hi gītam | jñānātmane-jñānasvarūpāya | sadasate-cidacidadhiṣṭhātre | tasmai rūpāya nama ityanvayaḥ |
omiti || oṃ namo vāsudevāyelyādiḥ caturvyūhamantraḥ |
iti śrīviṣṇupurāṇavyākhyāne śrīviṣṇucittīye paṃcamāṃśe'ṣṭādaśo'dhyāyaḥ |