Indrajala 100.1-2

100.1-2

nakṣatraistu jvaro'sādhyaḥ sādhyo'pi sa cikitsitaḥ
riṣṭirhārītanirdiṣṭā sā cātra likhyate mayā
janmādhāne ca nidhane pratyarau ca vipadgatau
yadi vyādhiḥ samutpannaḥ kleśāya maraṇāya vā
jyotiścakre dhaniṣṭhādinakṣatrāṇāṃ viceṣṭitam
daśarātraṃ dhaniṣṭhāsu jvaro bhavati dehinām
ṣaḍrātraṃ vā daśāhaṃ vā bhavet śatabhiṣājjvaraḥ
tathā bhādrapadāsvetat pūrvāṃsu maraṇaṃ dhruvam
uttarāsu bhavenmokṣo divase'rddhacaturdaśe
ṣaḍrātraṃ pañcarātraṃ vā revatyāṃ varttate jvaraḥ
aśvinyāmapi ṣaḍrātrāt sukhaṃ sampadyate dhruvam
bharaṇyāñca yamastiṣṭhet maraṇaṃ pañcame'hani
kṛttikāyāṃ gṛhītasya saptarātraṃ bhavejjvaraḥ
na muñced yadi saptāhādekaviṃśatime sukham
rohiṇyāmaṣṭarātreṇa sukhamekādaśena vā
mṛgaśīrṣe jvaro'pyetannavarātramathāpi vā
ārdrāyāmupasṛṣṭasya pañcāhānmṛtyumādiśet
ūrddhaṃ yadyapi vartteta tripakṣānmṛtyumādiśet
punarvasūpasṛṣṭena jvareṇa paripīḍitam
trayodaśāhato muñcet saptaviṃśe'thavā'hani
puṣye trirātraṃ jvaritaṃ saptāhānnātivarttate
aśleṣāyāṃ bhavenmṛtyurdīrghakālakramādapi
maghāyāṃ dvādaśāhena mṛtyurbhavati dehinām
ūrddhaṃ tato maghāyāntu punareva sukho naraḥ
pūrvāsu copasṛṣṭasya phalgunīṣu bhaved yamaḥ
uttarāsu tathāṣṭāhaṃ navarātramathāpi vā
ekaviṃśatirātrādvā jvaraśāntiṃ samṛcchati
hasteṣu saptame mokṣaścitrāyāmaṣṭame'hni ca
ūrddhaṃ viyujyamāno'sau muñceccitrāgame punaḥ
svātiyoge daśāhena muñcet pañcatrayeṇa vā
viśākhāsu bhavenmṛtyurerkāviṃśatime'hani
jvarastu divasānaṣṭāvanurādhāsu varttate
ata ūrddhaṃ na muktasya nāpi tasya cikitsitam
jyeṣṭhāyāṃ pañcame mṛtyurūddhaṃ vā dvādaśe sukham
mūle samupasṛṣṭasya daśarātraṃ bhavejjvaraḥ
ata ūrddhaṃ na muktasya nāpi tasya cikitsitam
āṣāḍhāyāntu pūrvāyāṃ navarātrāt pramucyate
ata ūrddhaṃ na muktasya nāpi tasya cikitsitam
uttarāsu āṣāḍhāsu māsamekaṃ hi kliśyate
aṣṭau vā nava māsān vā tato'sya sukhamādiśet
śravaṇe tvaṣṭarātraṃ vā kliśyate jvarapīḍitaḥ
etad bhagavatā proktaṃ nakṣatrāṇāṃ viceṣṭitam
ya enaṃ vetti tattvena sa rājārho bhiṣagvaraḥ