Indrajala 101.13

101.13

athātra tryambakaṃ mantramabhidhāsyānyanuṣṭubhā
yaṃ bhajantaṃ naraṃ kālaḥ svayaṃ vīkṣitumakṣamaḥ
vaśiṣṭho'sya ṛṣiḥ proktaśchando'nuṣṭubudāhṛtam
devatāsya samuddiṣṭā tryambakaḥ pārvatīpatiḥ
vibhaktairmantravarṇaiḥ syāt ṣaḍaṅgānāṃ prakalpana
hṛdayaṃ tribhirākhyātaṃ caturbhiḥ śira īritam
śikhāṣṭābhiḥ samuddiṣṭā navabhiḥ kavacaṃ matam
pañcabhirnnetramākhyātamastraṃ tribhirudāhṛtam
pūrvapaścimayāmyenduvaktreṣu tadanantaram
uro galāsyeṣu punarnābhihṛtpṛṣṭhakukṣiṣu
liṅgapāyūrumūlāntarjānuyugmaṃ tataḥ param
tadvattadyugmastanayoḥ pārśvayoḥ pādayoḥ punaḥ
pāṇyornāsikayoḥ śīrṣe mantravarṇān nyaset kramāt
padānyekādaśa nyaset śiro bhrūyugalākṣiṣu
vaktre gaṇḍayuge bhūyo hṛdaye jaṭhare punaḥ
guhyorujānupādeṣu nyāsamevaṃ samācaret