Pramāṇa · Search · About · API

Indrajalavidya 128

Indrajālavidyā 128

Language
Sanskrit

128.1

atha kautukam
nāsārandhradvayaṃ liptā goghṛtena tato mukhe
kṣipedvimbīphalaṃ yasya kuyogaiḥ sa na bādhyate

128.2

tagarāñjitanetro vā tagareṇā'tha dhūpitaḥ
pūrvaṃ rakṣāvidhiṃ kṛtvā paścāt kautukamāvahet
vinā rakṣāvidhānena yaḥ karoti sa sīdati

128.3

śmaśānatarumūlena kīṭotpātāṅgulīyakam
mṛtanirmālyasaṃyuktaṃ raktasūtreṇa veṣṭayet
tena niḥśeṣalokasya jāyate dṛṣṭibandhanam

128.4

kṣuṇṇatālakapañcāṅgaṃ kanakena yutā'thavā
mudrikā sarvalokasya pāṇisthā dṛṣṭibandhakṛt
svapāde dhārayedenāṃ paścāt sidhyati kautukam

128.5

bhaumapuṣye tu saṅgṛhya kṛkalāsaṃ manoharam
sthāpayennavabhāṇḍe tu raktapuṣpaiśca pūjayet
dhūpadīpākṣatairgandhairnaivedyaṃ mantrasaṃyutam
vāmahastakaniṣṭhāyāḥ svasya raktena secayet
saptāhaṃ pūjayedevaṃ śastaḥ syāt sarvakarmmasu
“oṃ aṅgolāya oṃ raḥ oṃ hrīṃ hrīṃ hrīṃ svāhā”
mantreṇānena pūjāyāṃ śatamaṣṭottaraṃ japet
śuddhātmā sādhakastena sarvasiddhikaraṃ bhavet

128.6

chāyāśuṣkaṃ mṛtaṃ tacca sañcūrṇya lepayet kaṭim
savastramapi taṃ lokā nagnamālokayanti hi

128.7

taccūrṇaṃ tālapatrantu lepitaṃ sarpasambhavam
nāgavallīdalaṃ liptaṃ bhūmau kṣiptaṃ samutpatet

128.8

taccūrṇaṃ kaumudaṃ kandaṃ nāgavallīdalānvitam
limpedbhāṇḍaṃ peṣayitvā tadbhāṇḍe na viśejjalam

128.6-2

mayūrantu śilātālaṃ bhojayitvā'hasaptakam
tadviṣṭhāliptahastaścādṛśyakaṃ śakro'pi nekṣate

128.10

saptāhaṃ tilatailena bhāvayedātape khare
aṅkolabījacūrṇantu śoṣyaṃ peṣyaṃ punaḥ punaḥ
tat tailaṃ grāhayeccaiva tailakārasya yantrataḥ
athavā kāṃsyapātre hi tena kalkena lepayet
utthāpya sthāpayed gharme sammukhantu parasparam
tayoradhaḥ kāṃsyapātre patitaṃ tailamāharet
idamevāṅkolotailaṃ sarvayogeṣu yojayet

128.11

liptamāṅkolatailena muṇḍitaṃ tatkṣaṇācchiraḥ
pūrvavat pūryete keśaiḥ sadya eva na saṃśayaḥ

128.12

tat tailaliptamāmrāṇḍaṃ śoṣitaṃ nikhanet kṣaṇāt
saphalo jāyate vṛkṣastatkṣaṇātrāta saṃśayaḥ

128.13

padminībījacūrṇantu bhāvyamaṅkolatailataḥ
nyastaṃ jale mahāścaryyaṃ tatkṣaṇāt kamalodbhavaḥ

128.14

bījaṃ nīlotpalodbhūtaṃ sikta maṅkolatailataḥ
nyastaṃ jale mahāścaryyaṃ tatkṣaṇāt puṣpasambhavaḥ

128.15

yāni kāni ca bījāni jalajasthalajāni ca
aṅkulītailaliptāni kṣaṇāttānyudbhavanti vai

128.16

yatkiñciṅgāta mūlasya patrapuṣpaphalādikam
aṅkulītailaliptaṃ tadanurūpaṃ bhaviṣyati

128.17

kṛtvāttamaṅkulītailaṃ tvak patraṃ śiśiraṃ jalam
tālakaṃ, sarpanirmokaṃ śikhipittena saṃyutam
ravau kanyakayā piṣṭaṃ chāyāśuṣkaṃ vaṭī kṛtā
tayā kumudanālasya sparśāt sarpākṛtirbhavet

128.18

vaṭikāsparśamātreṇa mṛttikā lauhavadbhavet
tāmrabhāṇḍāni sarvāṇi tayā liptāni hemavat
dṛśyante taptatoyena kṣālitāni sudhāmbhravat

128.19

dṛśyante raktaguñjāśca śvetāstallepato dhruvam
akṣapatraṃ tayā spṛṣṭaṃ dṛśyate kāṃsyabhājanam
snuhopatre tayā lipte śuṣkavahvaśyate jalam
tayā lipte nṛkarṇe tu dṛśyate chinnaśīrṣavat

128.20

ravīndugrahaṇaṃ bhāti tayā lipte tu darpaṇe
aṅgulī ca tayā liptā dvidhā saṃdṛśyate dhruvam

128.21

bhāṇḍapākasthalādbhasma kumbhakārasthalāddharet
sārddhaṃ guṭikayā bhasma muṣṭibandhaṃ bhuvi kṣipet
samudro dṛśyate lokaiḥ satyaṃ citraṃ śivoditam

Linked texts (5)