Tararahasya 3.10

3.10

prakuryādvaidikasnānaṃ tāntrikaṃ tadanantaram |
sandhyāñca vaidikīṃ kṛtvā tāntrikīṃ svayamācaret ||
jale trikoṇaṃ saṃlikhya tīrthānyāvāhayettataḥ |
tattvenācamanaṃ kṛtvā vahnijāyāntamantrataḥ ||
kuśaiḥ samūlairudakaṃ dadyācchīrṣe ca sādhakaḥ |
tatañca bhūmau dātavyaṃ saptadhā sādhakottamaḥ ||
vāmahaste jalaṃ nītvā cācchādya dakṣiṇena ca |
mantaṃ vāratrayaṃ japtvā pañca varṇān japettataḥ ||
kṣāntaṃ candrasamāyuktaṃ saptavarṇādyameva ca |
(p. 9) vahnibījaṃ pṛthivyāśca vāruṇaṃ tadanantaram ||
ha/ ya/ va/ la/ ra/ ityekajaṭāmantre'ghamarṣaṇamantrakam ||
mudrayā snāpayecchīrṣaṃ galitodakabindubhiḥ |
mudrā tu tattvamudrā syāt sandhyāyāṃ kulatarpaṇe ||
tajjalaṃ dakṣahastena vāmanāḍīṃ praropayan |
astrabījena mantreṇa puraḥ pāṣāṇavajrake ||
tāḍayet sādhakaḥ sarvasiddhaye jñānasiddhaye |
kṛṣṇavarṇaṃ jalaṃ dhyātvā pāpena puruṣeṇa ca ||
nāḍīnāṃ chālanaṃ kṛtvā dehasya kṣālanaṃ tathā |
tataśca tarpayeddevīmamṛtānandarūpiṇīm ||
devānṛṣīn pitṝṃścaiva guruṃ paraguruṃ tataḥ |
parāparaguruñcaiva parameṣṭhiguruṃ tataḥ |
tato mūlaṃ samuccārya devī tārāṃ tataḥ param ||
śrīmadekajaṭāṃ paścāt tarpayāmi tataḥ param ||
prakāśaśaktiyuktāya idamarghyamahaṃ dade ||
mārtaṇḍamaṇḍale dhyātvā tārāñcaikajaṭāṃ tathā |
gāyattryārghyaṃ pradadyācca trayaṃ kusumasaṃyutam ||
gāyattrīñca tato dhyāyejjapedviṃśatisaṃkhyakam ||