Sharadatilaka 4.30

4.30

gandhādi ghrāṇasaṃyuktāṃ pṛthivīmapsu saṃharet
rasādi jihvayā sārddhaṃ jalamagnau vilāpayet
rūpādi cakṣuṣā sārddhamagniṃ vāyau vilāpayet
samīramambare vidvān sparśādi tvaksamanvitam
ahaṅkāre hared vyoma saśabdaṃ taṃ mahatyapi
mahacca sarvvaśaktīnāmavyakte kāraṇe pare
saccidānandarūpaṃ yat vaiṣṇavaṃ paramaṃ padam
pṛthivyādikramāt sarvvaṃ tatra līnaṃ vicintayet || iti
tadvāyubījaṃ dhūmrañca cañcaladhvajasaṃyutam
dhūm̐ dhūm̐ śabdayutaṃ sarvvaśodhanantvīśadaivatam
cintayeddhṛdaye raktaṃ trikoṇaṃ vahnimaṇḍalam
vidyākalāyutaṃ rudradaivatañca ramoritam
tadbījotthāgninā tad bhasmībhūtaṃ vibhāvayet | tato recakena dvātriṃśanmātrayā pañcaviṃśatimātrayā vā pūrvvoktarūpaṃ vāyubījamāvarttya pāpapuruṣabhasma recayet | tato
vamiti varuṇabījasya hiraṇyagarbha ṛṣirum̐so devatā triṣṭup chandaḥ plāvane
viniyogaḥ ityuktvā
vāruṇaṃ maṇḍalaṃ mūrddhni śubhraṃ candrārddhasannibham
sitapaṅkajayugmasthaṃ vaṃ syād varuṇadaivatam
iti dhyātvā tadbījasrutāmṛtena taccharīrabhasma piṇḍībhūtaṃ vibhāvayet | tato
lamiti pṛthivībījasya brahmā ṛṣirindro devatā gāyatrī chandaḥ kaṭhinīkaraṇe
viniyogaḥ ityuktvā
ādhāramaṇḍale pṛthvīmaṇḍalaṃ vajralāñchitam
catuṣkoṇañca kaṭhinaṃ pītavarṇṇendradaivatam
laṃ bījena samāyuktaṃ dhyāyenmanasi pūrvvavat
iti dhyātvā tadbījotthakāṭhinyena tanuṃ dṛr̤hāṃ bhāvayet | tato hamityākāśabījasya
brahmā ṛṣirākāśaṃ devatā paṃkti śchandaḥ vyūhane viniyogaḥ ityuktvā
ākāśamaṇḍalaṃ vṛttaṃ dvādaśānte hyujjvalam
śāntyatītākalāyuktaṃ cintyamākāśadaivatam
iti dhyātvā tadutthenākāśenāvakāśaṃ bhāvayet | taduktam -
glaumiti pṛthivībījena tacca sahanatāṃ nayet
oṃ haṃ vamiti bījenā'vayavīkaraṇaṃ bhavet || iti
evaṃ svaśarīraṃ vicintya paramātmanaḥ sakāśāt sṛṣṭikalpeṇa tattvāni svasvasthānaṃ
prāpayediti | tataḥ paramātmanaḥ sakāśājjīvaṃ so'haṃ mantreṇa hṛtpadmamānayediti
saṃkṣepaḥ | iyañca bhūtaśuddhirāvaśyakīyā
bhūta[pañca]śuddhivihīnena kṛtā pūjā'bhicāravat[japādikam]
viparītaṃ phalaṃ dadyādabhaktyā cārcanaṃ tathā
nirvvṛttirvidhihīnānāṃ phalaṃ hanti hi karmmaṇām
niśācarādhipatyañca kurute śaṅkarājñayā
iti śaivāgama ukteḥ
anyatrāpi-śarīrākārabhūtānāṃ bhūtānāṃ yad viśodhanam
avyayabrahmasamparkād bhūtaśuddhiriyaṃ matā
bhūtaśuddhiṃ vinā karmma japahomārcanādikam
manunā haṃsadevasya kuryyānnyāsādikaṃ tataḥ
ṛṣicchandodaivatāni nyaset mantrasya mantravit