Sharadatilaka 4.88

4.88

yadā tu śaṅkaraṃ madhye aiśānyāṃ śrīpatiṃ yajet
āgneyyāñca tathā haṃsaṃ nairṛtyāṃ pārvatīsutam
vāyavyāñca sadā pūjyā bhavānī bhaktavatsalā
yadā tu madhye govindamaiśānyāṃ śaṅkaraṃ yajet
āgneyyāṃ gaṇanāyañca nairṛtyāṃ tapanantathā
vāyavyāmambikāñcaiva yajenmantrau samāhitaḥ
sahasrāṃśuṃ yadā madhye aiśānyāṃ pārvatīpatim
āgneyyāmekadantañca nairṛtyāmacyutaṃ yajet
vāyavyāṃ pūjayed devīṃ bhogamokṣaikabhūmikām
bhavānīntu yadā madhye aiśānyāṃ mādhavaṃ yajet
āgneyyāṃ pārvatīnāthaṃ nairṛtyāṃ gaṇanāyakam
pradyotanantu vāyavyāmācāryyastu prapūjayet
herambantu yadā madhye aiśānyāmacyutaṃ yajet
āgneyyāṃ pañcavaktrantu nairṛtyāṃ jagadambikām
vāyavyāṃ dyumaṇiñcaiva yajenmantrau hyatandritaḥ
svasthānavarjitā devāḥ śokaduḥkhabhayapradāḥ
tanmaṇḍala sthito rājā sādhakaśca vinaśyati || iti
bhāsyenāgasutā ravau haragaṇeśājāmbikāḥ sthāpitāḥ
devyāṃ viṣṇuharaikadantaravayo lambodare'jeśakharāryyenāḥ śaṅkarabhāgato'tiśubhadā vyastāstu te hānidāḥ || iti
sūryyaikadantācyutaśaktirudrā vighneśvareśādrisutārkakṛṣṇāḥ
śrīnāthavighneśabhagāmbikeśā svaṇḍḍīśa herambapataṅgakṛṣṇāḥ
śrīśambhusūryākhurathāmbakṛṣṇāḥ pradakṣiṇa madhyamvidikṣu pūjyāḥ
svasthānagāḥ sarvvamanorathāptyai arthaṃ vinighnanti paratra saṃsthāḥ || iti
anyatrāpi-madhye'bhyarcya hariṃ gaṇeśinanagajāśambhī gaṇaṃ madhyataḥ
śaṃrdhvāryyaraviviṣṇāvo ravimatho vighneśaśaktīśvarāḥ
madhye śaktimatheśavighnaravayo viṣṇośca madhye haraṃ
sūryyebhāsyaśivācyutā hi vihitā āgneyakoṇādimāḥ || iti
mukhye puṣpāñjaliṃ dattvā gaṇeśādyarcanaṃ bhavet
gaṇeśa eva mukhyaścet tatra sūryyakramādbhavet || iti
girijārātasaukhyāya jātā vighnaparāḥ surāḥ
tacchrutvā caritaṃ devyā śāpo datto'tidāruṇaḥ
pārvatīśāpasaṃyuktā devā aśmatvamāgatāḥ
viṣṇunā śaṅkareṇāpi tathā'nyaiḥ surasattamaiḥ
saṃstutā varadā jātā pāṣāṇatve'pi bho surāḥ
svasthāne pūjayiṣyanti puruṣārthacatuṣṭayam
dātuṃ samarthā madvākyādeṣa eva varo'rpitaḥ
tasmāt pūjā vidhātavyā pāṣāṇapratimāsu ca || iti
mṛnmayī dārughaṭitā lohajā ratnajā tathā
śailajā gandhajā caiva kausumī saptadhā smṛtā
kausumī gandhajā caiva mṛnmayī pratimā hitā
tatkālapūjitāścaitāḥ sarvvakāmaphalapradāḥ || iti
śailajā lohajā vāpi ratnajā vātha dārujā
mṛnmayī ceti pañcaitāḥ pratimāḥ parikīrttitāḥ
sarvveṣāmeva devānāṃ mahānīlā yaśaḥpradā
cipiṭā duḥkhaśokāya anetrā netranāśinī
duḥkhadā hīnavaktrā tu pāṇipādakṛśā tathā
hīnāṃsā hīnajaṅghā ca bhramonmādakarī nṛpa
śuṣkavaktrā ca rājānaṃ kaṭihīnā ca mārayet
pāṇipādavihīnāyāṃ jāyate narakī mahān
jaṅghāhīnā ca yā mūrttiḥ śatrukalyāṇakāriṇī
putramitravināśāya hīnā vakṣaḥsthalena yā
sampūrṇāvayavā yā tu āyulakṣmīpradā sadā
evaṃ lakṣaṇamāsādya karttavyā mūrttiruttamā || iti
khaṇḍite sphuṭite bhraṣṭe dagdhe mānavivarjite
yāgahīne'thavocchiṣṭe patite duṣṭabhūmiṣu
anyamantrārcite caiva patitasparśadūṣite
daśasveteṣu no cakruḥ sannidhānaṃ divaukasaḥ
iti sarvvagato viṣṇuḥ paribhāṣāṃ cakāra ha || iti
khaṇḍitāṃ sphuṭitāṃ jīrṇāmavalīḍhāñca vahninā
pratimāṃ varjayed yatnād bhagnāṃ svāṅgalakṣaṇāñcutām
nikṣipeddārujāmagnau tathā'nyāmapsu nikṣipet || iti
ekāhapūjāvihṛtau kuryyād dviguṇamarcanam
trirātre tu mahāpūjāṃ saṃprokṣaṇamataḥparam
māsādūrddhamanekāhaṃ pūjā yadi vihanyate
pratiṣṭhaiveṣyate kaiścit kaiścit saṃprokṣaṇakramaḥ
saṃprokṣaṇantu devasya devamudvāsya pūrvvavat
pañca pañca krameṇaiva snāpayitvā mṛdambhasā
gavāṃ rasaiśca saṃsnāpya darbhatoyairviśodhya ca
prokṣayet prokṣaṇītoyairmūlenāṣṭottaraṃ śatam
sapuṣpaṃ sakuśalaṃ pāṇiṃ nyasya devasya mastake
pañcavāraṃ japenmūlamaṣṭottaraśatottaram
tato mūlena mūrddhādi pīṭhāntaṃ saṃspṛśedapi
mūlamantraṃ samuccāryya suṣumṇāvartmanā sudhīḥ
ānīya tejaḥ svasthānānnāsikārandhranirgatam