Pramāṇa · Search · About · API

Aitareya Āraṇyaka 4.1

Aitareyāraṇyaka 4.1

Language
Sanskrit

4.1

vidā́ maghavan vidā́ gātúm, ánu śaṃsiṣo díśaḥ | śíkṣā śacīnāṃ pate, pūrvīṇā́ṃ purūvaso || 1 ||
ābhíṣ ṭvám abhíṣṭibhiḥ, prácetana prá cetaya | índra dyumnā́ya na iṣá, evā́ hí śakráḥ || 2 ||
rāyé vā́jāya vajrivaḥ, śáviṣṭha vajrinn ṛñjáse | máṃhiṣṭha vajrinn ṛñjáse, ā́ yāhi píba mátsva || 3 ||
vidā́ rāyáḥ suvī́ryaṃ, bhúvo vā́jānāṃ pátir váśāṃ ánu | máṃhiṣṭha vajrinn ṛñjáse, yáḥ śáviṣṭhaḥ śū́rāṇām || 4 ||
yó máṃhiṣṭho maghónāṃ, cíkitvo abhí no naya | índro vide tám u stuṣe, vaśī́ hí śakráḥ || 5 ||
tám ūtáye havāmahe, jétāram áparājitam (RV I 11,2d, V 25,6d) | sá naḥ parṣad áti dvíṣaḥ (RV X 187,1-5c), krátuś chandá ṛtáṃ bṛhát || 6 ||
índraṃ dhánasya sātáye (RV VIII 3,5d) havāmahe, jétāram áparājitam (RV I 11,2d, V 25,6d) | sá naḥ parṣad áti dvíṣaḥ (RV X 187,1-5c), sá naḥ parṣad áti srídhaḥ || 7 ||
pū́rvasya yát te adrivaḥ, sumná ā́ dhehi no vaso | pūrtíḥ śaviṣtha śasyáta, ī́śe hí śakráḥ || 8 ||
nūnáṃ táṃ návyaṃ sáṃnyase, prábho jánasya vṛtrahan | sám anyéṣu bravāvahai (RV I 30,6c), śū́ro yó góṣu gáchati, sákhā suśévo ádvayāḥ (RV I 187,3d) || 9 ||
evā́ hy eváivā hy agnā́3i ||
evā́ hy eváivā hīndrā́3 ||
evā́ hy eváivā hi viṣṇā́3u ||
evā́ hy eváivā hi pūṣā́3n ||
evā́ hy eváivā hi devā́3ḥ || 10 ||
evā́ hí śakró, vaśī́ hí śakró váśā3ṁ ánu ||
ā́ yó mányāya manyáva, úpo mányāya manyáve ||
úpehi viśvádha || 11 ||
vidā́ maghavan vidó3m ||
|| ity aitareyāraṇyake caturthāraṇyaṃ samāptam ||

Commentaries (1)

Linked texts (1)

Discussed in (2)