Pravargya Brāhmaṇa of the Taittirīya Āraṇyaka 9
Pravargyabrāhmaṇa 9
- Language
- Sanskrit
9.1
bra̱hma̱ṇastvā̱ para̱syāyā̱ ityā̍ha(1), dadhāti(2),
a̱nvitye̍(3), ra̱kṣa̱ghnī ra̱kṣasā̱mapa̍hatyai(4), va hira̍ṇyaṃ(5), ā̱ha(6), a̱rddhaya̍ti(7), hye̱ṣaḥ(8), gṛ̱ṇā̱tvityā̍ha(9), ma̱nu̱ṣyā̱nityā̍ha(10), a̱syai̱ṣaḥ(11), a̱ṣṭau
ca̍ || anu0 9
(1)pra̱jāpa̍ti̱ṃ vai de̱vāḥ śu̱kraṃ payo̍'duhan | tade̍bhyo̱ na
vya̍bhavat | tadvya̍karot | tāni̍ śu̱kriyā̍ṇi̱ sāmā̍nyabhavan | teṣā̱ṃ yo raso̱'tyakṣa̍rat | tāni̍ śu̱krayajū̍m̐ṣya̍bhavan | śu̱kriyā̍ṇāṃ vā e̱tāni̍ śu̱kriyā̍ṇi | sā̱mapaya̱saṃ vā e̱tayo̍ra̱nyat | de̱vānā̍ma̱nyat paya̍ḥ | yad
goḥ paya̍ḥ
9.2
tatsa̱āmnaḥ paya̍ḥ | yada̱jāyai̱ paya̍ḥ | tadde̱vānā̱ṃ paya̍ḥ | tasmādyadyaitairyaju̍rbhi̱ścara̍nti | tatpaya̍sā caranti | pra̱jāpa̍time̱va tadde̱vān paya̍sānnā̱dyena̱ sama̍rddhayanti(1) | (2)e̱ṣa
ha̱ vai sā̱kṣāt pra̍va̱rgya̍ṃ bhakṣayati | yasyai̱vaṃ vi̱duṣa̍ḥ pra̱vargya̍ḥ pravṛ̱jyate̍(2) | (3)u̱ttara̍vedyāmu̱dvāsa̍ye̱t teja̍skāmasya
tejo̱ vā u̍ttarave̱diḥ
9.3
teja̍ḥ pra̱vargya̍ḥ | teja̍sai̱va teja̱ḥ sama̍rddhayati(3) | (4)uttara̍vedyāmu̱dvāsa̍yeda̱nna̍kāmasya | śiro̱ vā e̱tadya̱jñasya̍
yat pra̍va̱rgya̍ḥ | mukha̍muttarave̱diḥ | śī̱rṣṇai̱va mukha̱m̐ sanda̍dhātyannā̱dyāya̍ | a̱nnāda e̱va bha̍vati(4) | (5)yacca̱ khalu̱
vā e̱tamu̱dvāsi̍ta̱ṃ vayām̐̍si̱ pra̱vyāsa̍te | pari̱ vai tāḥ
sarvā̍ḥ pra̱jā vayām̐̍syāsate
9.4
tasmā̍duttarave̱dyāme̱vodvāsa̍yet | pra̱jānā̍ṃ gopī̱thāya̍(5) | (6)pu̱ro vā̍ pa̱ścāddodvāsa̍yet | pu̱rastā̱dvā e̱tajjyoti̱rude̍ti | tatpa̱ścānnirmro̍cati | svāme̱vainā̱ṃ yoni̍manū̱dvāsa̍yati(1) | (7)a̱pāṃ madhya̱ udvā̍sayet | a̱pāṃ vā
e̱tanmadhyā̱jjyoti̱rajāyata | jyoti̍ḥ pra̱vargya̍ḥ | sva e̱vaina̱ṃ
yonau̱ prati̍ṣṭhāpayati(7)
9.5
(8)yaṃ dvi̱ṣyāt | yatra̱ sa syāt | tasyā̍ṃ di̱śyudvā̍sayet
e̱ṣa vā a̱gnirvai̍śvā̱naraḥ | yat pra̍va̱rgyaḥ | a̱gni̱nai̱vaina̍ṃ
vaiśvā̱na̱reṇā̱bhiprava̍rttayati(8) | (9)audu̍mba̱ryyāḥ śākhā̍yā̱mudvā̍sayet | ūrgvā udumba̱raḥ | anna̍ṃ prā̱ṇaḥ | śug gha̱rmmaḥ
9.6
i̱da̱ma̱hama̱muṣyā̍muṣyāyaṇa̱sya̍ śu̱cā prā̱ṇamapi̍ dahāmītyā̍ha | śu̱caivā̱sya̍ prā̱ṇamapi̍ dahati | tā̱jagā̱rttimāccha̍ti(9) | (10)yatra̍ da̱rbhā u̍pa̱dīka̍santatāḥ syuḥ | tadudvā̍saye̱d vṛṣṭi̍kāmasya | e̱tā vā a̱pāma̍nū̱jāva̍ryyā̱
nāma̍ | yadda̱rbhāḥ | a̱sau khalu̱ vā ā̍di̱tya i̱to
vṛṣṭi̱mudī̍rayati | a̱sāve̱vāsmā̍ ā̱dityo vṛṣṭi̍ṃ niya̍cchati | tā āpo̱ niya̍tā̱ dhanva̍nā yanti(10)
Linked texts (2)
- Taittirīyāraṇyaka — Sanskrit
- Yajurveda — Sanskrit