Pramāṇa · Search · About · API

Taittirīya Āraṇyaka 4.18

Taittirīyāraṇyaka (complete text) 4.18

Language
Sanskrit

4.18

57 yāste agna ārdrā yonayo yāḥ kulāyinīḥ | ye te agna indavo yā u nābhayaḥ | yāste agne tanuva ūrjo nāma | tābhistvamubhayībhissaṃvidānaḥ | prajābhiragne draviṇeha sīda | prajāpatistvā sādayatu | tayā devatayā'ṅgirasvaddhruvā sīda ||

4.18.p1

58 agnirasi vaiśvānaro'si | saṃvathsaro'si parivathsaro'si |
idāvathsaro'sīduvathsaro'si | idvathsaro'si vathsaro'si | tasya te vasantaḥ śiraḥ | grīṣmo dakṣiṇaḥ pakṣaḥ | varṣāḥ puccham | śaraduttaraḥ pakṣaḥ | hemanto madhyam | pūrvapakṣāścitayaḥ | aparapakṣāḥ purīṣam | ahorātrāṇīṣṭakāḥ | tasya te māsāścārdhamāsāśca kalpantām | ṛtavaste kalpantām | saṃvathsaraste kalpatām | ahorātrāṇi te kalpantām | eti preti vīti samityuditi | prajāpatistvā sādayatu | tayā devatayā'ṅgirasvaddhruvassīda ||

4.18.p2

59 bhūrbhuvassuvaḥ | ūrdhva ū ṣu ṇa ūtaye | ūrdhvo naḥ pāhyaṃhasaḥ |
vidhuṃ dadrāṇaṃ samane bahūnām | yuvānaṃ santaṃ palito jagāra | devasya paśya kāvyaṃ mahitvā'dyā mamāra | sa hyassamāna | yadṛte cidabhiśriṣaḥ | purā jartṛbhya ātṛdaḥ | sandhātā sandhiṃ maghavā purovasuḥ ||

4.18.p3

60 niṣkartā vihrutaṃ punaḥ | punarūrjā saha rayyā | mā no gharma vyathito vivyatho naḥ | mā naḥ paramadharaṃ mā rajo'naiḥ | moṣvasmāgstamasyantarā dhāḥ | mā rudriyāso abhigurvṛdhā naḥ | mā naḥ kratubhirhīḍitebhirasmān | dviṣā sunīte mā parādāḥ | mā no rudro nirṛtirmā no astā | mā dyāvāpṛthivī hīḍiṣātām ||

4.18.p4

61 upa no mitrāvaruṇāvihāvatam | anvādīdhyāthāmiha nassakhāyā | ādityānāṃ prasitirhetiḥ | ugrā śatāpāṣṭhā gha viṣā pari ṇo vṛṇaktu | imaṃ me varuṇa tattvā yāmi | tvaṃ no agne sa tvaṃ no agne | tvamagne ayāsi |
udvayaṃ tamasaspari | udu tyaṃ citram | vayassuparṇāḥ ||

Other recensions (1)

Linked texts (4)