Taittirīya Āraṇyaka 5.1
Taittirīyāraṇyaka 5.1
- Language
- Sanskrit
5.1.1
devā́ vái satrám ā́sata \
ṛ́ddhiparimitaṃ yáśaskāmāḥ \
tè 'bruvan \
yán naḥ prathamáṃ yáśa ṛcchā́t \
sárveṣāṃ nas tát sahā́sad íti \
téṣāṃ kurukṣetráṃ védir āsīt \
tásyai khāṇḍavó dakṣiṇārdhá āsīt \
tū́rghnam uttarārdháḥ \
parīṇáj jaghanārdháḥ \
maráva utkaráḥ \
5.1.2
téṣāṃ makháṃ vaiṣṇaváṃ yā́śa ārcchat \
tán ny àkāmayata \
ténā́pākrāmat \
táṃ devā́ ánvāyan \
yáśo varúrutsamānāḥ \
tásyānvā́gatasya \
savyā́d dhánur ájāyata \
dákṣiṇād íṣavaḥ \
tásmād iṣudhanváṃ púṇyajanma \
yajñájanmā hí \ yajñájanma?
5.1.3
tám ékam̐ sántam \
bahávo nā́bhyadhṛṣṇuvan \
tásmād ékam iṣudhanvínam \
bahávo 'niṣudhanvā́ nā́bhí dhṛṣṇuvanti \
sò'smayata \
ékaṃ mā sántaṃ bahávo nābhy àdharṣiṣur íti \
tásya siṣmiyāṇásya téjó 'pākrāmat \
tád devā́ óṣadhīṣu nyàmṛjuḥ \
té śyāmā́kā abhavan \
smayā́kā vái nā́maité \
5.1.4
tát smayā́kānām̐ smayākatvám \
tásmād dīkṣiténāpigṛ́hya smetavyàm \
téjaso dhṛ́tyai \
sá dhánuḥ pratiṣkábhyātiṣṭhat \
tā́ upadī́kā abruvan váraṃ vṛṇāmahai \
átha va imám̐ randhayāma \
yátra kvà ca khánāma \
tád apò 'bhí tṛṇadāméti \
tásmād upadī́kā yátra kvà ca khánanti \
tád apò 'bhí tṛndanti \
5.1.5
vā́revṛtam̐ hy ā̀sām \ ---
tásya jyā́m ápyādan \
tásya dhánur viprávamāṇam̐ śira úd avartayat \
tád dyā́vāpṛthivī́ ánu prā́vartata ---
yát prā́vartata \
tát pravargyàsya pravargyatvám \
yád ghrā́m̐3 íty ápatat \
tád gharmásya gharmatvám \
maható vīryàm apaptad íti \
tán mahāvīrásya mahāvīratvám \
5.1.6
yád asyā́ḥ samábharan \
tát samrā́jñaḥ samrāṭtvám \
tám̐ stṛtáṃ devátās tredhā́ vy àgṛhṇata \
agníḥ prātaḥsavanám \
índro mā́dhyaṃdinam̐ sávanam \
víśve devā́s tṛtīyasavanám \
ténā́paśirṣṇā yaj~néna yájamānāḥ \
nāśiṣo 'vā́rundhata \
ná suvargáṃ lokám abhy àjayan \
té devā́ aśvínāv abruvan \
5.1.7
bhiṣájau vái sthaḥ \
idáṃ yajñásya śíraḥ práti dhattam íti \
tā́v abrūtāṃ váraṃ vṛṇāvahai \
gráha evá nāv átrā́pi gṛhyatām íti \
tā́bhyām etám āśvinám agṛhṇan \
tā́v etád yajñásya śíraḥ práty adhattām \
yát pravargyàḥ \
téna sáśīrṣṇā yajñéna yájamānāḥ \
ávāśiṣo 'rundhata \
abhí suvargáṃ lokám ajayan \
yát pravargyàṃ pravṛṇákti \
yajñásyaivá tác chíraḥ práti dadhāti \
téna sáśīrṣṇā yajñéna yájamānaḥ \
ávāśiṣo rundhé \
abhí suvargáṃ lokā́ṃ jayati \
tásmād eṣá āśvinápravayā iva \
yát pravargyàḥ \ \\ utkaró hy èté tṛndanti mahāvīratvám ábruvann ajayant saptá ca \\
Commentaries (1)
- Taittirīyāraṇyakabhāṣya (Sāyaṇa) — Sāyaṇa, Sanskrit
Linked texts (3)
- Yajurveda — Sanskrit
- Kaṭhāraṇyaka — Sanskrit
- Pravargyabrāhmaṇa — Sanskrit
Discussed in (16)
- The Religion and Philosophy of the Veda and Upanishads — Keith 1925, English
- Vedic Index of Names and Subjects — Macdonell & Keith 1912, English
- Die Religion des Veda — Oldenberg 1894, German
- History of Dharmaśāstra (Ancient and Mediaeval Religious and Civil Law in India) — Kane 1930, English
- The History and Culture of the Indian People — Majumdar et al. 1951, English
- Purāṇic Encyclopaedia: A Comprehensive Dictionary with Special Reference to the Epic and Purāṇic Literature — Mani 1964, English
- An Encyclopaedia of Indian Archaeology — Ghosh 1989, English
- Original Sanskrit Texts on the Origin and History of the People of India, their Religion and Institutions — Muir 1858, English
- Altindische Grammatik — Wackernagel & Debrunner 1896, German
- A Vedic Concordance — Bloomfield 1906, English
- Historical Geography of Ancient India — Law 1954, English
- The Hindu Temple — Kramrisch 1946, English
- The History of Indian Literature — Weber 1852, English
- Vedic Mythology — Macdonell 1897, English
- The Inner Conflict of Tradition: Essays in Indian Ritual, Kingship, and Society — Heesterman 1985, English
- Materials for the Study of the Early History of the Vaishnava Sect — Raychaudhuri 1920, English