Pramāṇa · Search · About · API

Taittirīya Āraṇyaka 5.8

Taittirīyāraṇyaka 5.8

Language
Sanskrit

5.8.1

víśvā ā́śā dakṣiṇasád íty āha \
víśvān evá devā́n prīṇāti \
átho dúriṣṭyā eváinaṃ pāti \
víśvān devā́n ayāḍ ihéty āha \
víśvān evá devā́n bhāgadhéyena sám ardhayati \
svā́hākṛtasya gharmásya mádhoḥ pibatam aśvinéty āha \
aśvínāv evá bhāgadhéyena sám ardhayati \
svā́hāgnáye yajñíyāya śáṃ yájurbhir íty āha \
abhy èváinaṃ ghārayati \
átho havír evā́kaḥ \

5.8.2

áśvinā gharmáṃ pātam̐ hārdivānám áhardivā́bhir ūtíbhir íty āha \
aśvínāv evá bhāgadhéyena sám ardhayati \
ánu vāṃ dyā́vāpṛthivī́ mam̐sātām íty āhā́numatyai \
svā́héndrāya svā́héndrā váḍ íty āha \
índrāya hí puró hūyáte \
āśrā́vyāha gharmásya yajéti \
váṣaṭkṛte juhoti \
rákṣasām ápahatyai \
ánu yajati svagā́kṛtyai \
gharmám apātam aśvinéty āha \

5.8.3

pū́rvam evóditam \
úttareṇābhí gṛṇāti \
ánu vāṃ dyā́vāpṛthivī́ amam̐sātām íty āhā́numatyai \
táṃ prāvyàṃ yathāváṇ ṇámo divé námaḥ pṛthivyā́ íty āha \
yathāyajúr eváitát \
diví dhā imáṃ yajñáṃ yajñám imáṃ diví dhā íty āha \
suvargám eváinaṃ lokáṃ gamayati \
dívaṃ gacchāntárikṣaṃ gaccha pṛthivī́ṃ gacchéty āha \
eṣv èváinaṃ lokéṣu práti ṣṭhāpayati \
páñca pradíṣo gacchéty āha \

5.8.4

dikṣv èváinaṃ práti ṣṭhāpayati \
devā́n gharmapā́n gaccha pitṛ́̄n gharmapā́n gacchéty āha \
ubháyeṣv eváinaṃ práti ṣṭhāpayati \
yát pínvate \
várṣukaḥ parjányo bhavati \
tásmāt pínvamānaḥ púṇyaḥ \
yát prā́ṅ pínvate \
tád devā́nām \
yád dakṣiṇā \
tát pitṛṇā́m \

5.8.5

yát pratyák \
tán manuṣyā̀nām \
yád údaṅ \
tád rudrā́ṇām \
prā́ñcam údañcaṃ pinvayati \
devatrā́kaḥ \
átho khálu \
sárvā ánu díśaḥ pinvayati \
sárvā díśaḥ sám edhante \
antaḥparidhí pinvayati \

5.8.6

téjasó 'skandāya \
iṣé pīpihy ūrjé pīpihī́ty āha \
íṣam evórjaṃ yájamāne dadhāti \
yájamānāya pīpihī́ty āha \
yájamānāyaiváitā́m āśíṣam ā śāste \
máhyaṃ jyáiṣṭhyāya pīpihī́ty āha \
ātmána eváitā́m āśíṣam ā śāste \
tvíṣyai tvā dyumnā́ya tvendriyā́ya tvā bhū́tyai tvéty āha \
yathāyajúreváitát \
dhármāsi sudhármā́meny asmé bráhmāṇi dhārayéty āha \

5.8.7

bráhmann eváinaṃ práti ṣṭhāpayati \
nét tvā vā́taḥ skandáyād íti yády abhicáret \
amúṣya tvā prāṇé sādayāmy amúnā sahá nirartháṃ gacchéti brū́yād yáṃ dviṣyā́t \
yám evá dvéṣṭi \
ténainam̐ sahá nirartháṃ gamayati \
pūṣṇé śárase svā́héty āha \
yā́ evá devátā hutábhāgāḥ \
tā́bhya eváinaṃ juhoti \
grā́vabhyaḥ svā́héty āha \
yā́ evā́ntárikṣe vā́caḥ \

5.8.8

tā́bhya eváinaṃ juhoti \
pratirébhyaḥ svā́héty āha \
prāṇā́ vái devā́ḥ pratirā́ḥ \
tébhya eváinaṃ juhoti \
dyā́vāpṛthivī́bhyaḥ svā́héty āha \
dyā́vāpṛthivī́bhyām eváinaṃ juhoti \
pitṛ́bhyo gharmapébhyaḥ svā́héty āha \
yé vái yájvānaḥ \
té pitáro gharmapā́ḥ \
tébhya eváinaṃ juhoti \

5.8.9

rudrā́ya rudráhotre svā́héty āha \
rudrám evá bhāgadhéyena sám ardhayati \
sarvátaḥ sám anakti \
sarváta evá rudráṃ nirávadayate \
údañcaṃ nír asyati \
eṣā́ vái rudrásya dík \
svā́yām evá diśí rudráṃ nirávadayate \
apá úpa spṛśati medhyatvā́ya \
nā́nv īkṣate \
yád anvī́kṣeta \

5.8.10

cákṣur asya pramā́yukam̐ syāt \
tásmān nā́nvī́kṣyaḥ \
ápīparo mā́hno rā́triyai mā pāhy eṣā́ te agne samít táyā sám idhyasvā́yur me dā várcasā māñjīr íty āha \
ā́yur evā́smin várco dadhāti \
ápīparo mā rā́triyā áhno mā pāhy eṣā́ te agne samít táyā sám idhyasvā́yur me dā várcasā māñjīr íty āha \
ā́yur evā́smin várco dadhāti \
agnír jyótir jyótir agníḥ svā́hā sū́ryo jyótir jyótiḥ sū́ryaḥ svā́héty āha \
yathāyajúr eváitát \
brahmavādíno vadanti \
hotavyàm agnihotrā́3ṃ ná hotavyā́3m íti \

5.8.11

yád yájuṣā juhuyā́t \
áyathāpūrvam ā́hutī juhuyāt \
yán ná juhuyā́t \
agníḥ párā bhavet \
bhū́ḥ svā́héty evá hotavyàm \
yathāpūrvám ā́hutī juhóti \
nā́gníḥ párā bhavati \
hutám̐ havír mádhu havír íty āha \
svadáyaty eváinam \
índratame 'gnā́v íty āha \

5.8.12

prāṇó vā́ índratamo 'gníḥ \
prāṇá eváinam índratame 'gnáu juhoti \
pitā́ no 'si mā́ mā him̐sīr íty āhā́him̐sāyai \
aśyā́ma te deva gharma mádhumato vā́javataḥ pitumáta íty āha \
āśíṣam eváitā́m ā́ śāste \
svadhāvíno 'śīmáhi tvā mā́ mā him̐sīr íty āhā́him̐sāyai \
téjasā vā́ eté vy ṛ̀dhyante \
yé pravargyèṇa cáranti \
prā́śnanti \
téja evā́tmán dadhate \

5.8.13

saṃvatsaráṃ ná mām̐sám aśnīyāt \
ná rāmā́m úpeyāt \
ná mṛnmáyena pibet \
nā́sya rāmá úcchiṣṭaṃ pibet \
téja evá tát sám̐śyati \
devāsurā́ḥ sáṃyattā āsan \
té devā́ vijayám upayántaḥ \
vibhrā́ji sauryé bráhma sáṃ ny àdadhata \
yát kíṃ ca divākīrtyàm \
tád eténaivá vraténāgopāyat \
tásmād etád vratáṃ cāryàm \
téjaso gopīthā́ya \
tásmād etā́ni yájūm̐ṣi vibhrā́jaḥ sauryásyéty āhuḥ \
svā́hā tvā sū́ryasya raśmíbhya íti prātáḥ sám̐ sādayati \
svā́hā tvā nákṣatrebhya íti sāyam \
etā́ vā́ etásya devátāḥ \
tā́bhir eváinam̐ sám ardhayati \ \\ ajar aśvinétyāha pradíśo gacchétyāha pitṛṇām antaḥparidhí pinvayati dhārayéty āha vā́co gharmapā́s tébhya eváinaṃ juhoty anvī́kṣeta hotavyā́3m íty agnā́v ítyāha dadhate 'gopāyat saptá ca \\

Commentaries (1)

Linked texts (2)

Discussed in (3)