Gopathabrahmana 2.6.2

2.6.2

<ko adya naryo devakāmaḥ [ṚV 4.25.1]>_iti maitrāvaruṇaḥ_
<vane na vā yo ny adhāyi cākan [ṚV 10.29.1, ŚS 20.76.1]>_iti brāhmaṇācchaṃsī_
<ā yāhy arvāṅ upa vandhureṣṭhāḥ [ṚV 3.43.1]>_ity acchāvākaḥ_
etāni vā āvapanāni_
etair evāvapanair devāś carṣayaś ca svargaṃ lokaṃ āyan_
tathaivaitad yajamānā etair evāvapanaiḥ svargaṃ lokaṃ yanti
<sadyo ha jāto vṛṣabhaḥ kanīnaḥ [ṚV 3.48.1]>_iti maitrāvaruṇaḥ purastāt saṃpātānām aharahaḥ śaṃsati
tad etat sūktaṃ svargyam
etena sūktena devāś carṣayaś ca svargaṃ lokam āyan_
tathaivaitad yajamānā etenaiva sūktena svargaṃ lokaṃ yanti
tad ṛṣabhavat paśumad bhavati
paśūnām āptyai
tat pañcarcaṃ bhavati_
annaṃ vai paṅktiḥ_
annādyasyāvaruddhyai_
<ariṣṭair naḥ pathibhiḥ pārayantā [ṚV 6.69.1d]>_iti svargatāyā evaitad aharahaḥ śaṃsati_
<ud u brahmāṇy airata śravasyā [ṚV 7.23.1, ŚS 20.12.1]>_iti brāhmaṇācchaṃsī
brahmaṇvad etat sūktaṃ samṛddham
etena sūktena devāś carṣayaś ca svargaṃ lokam āyan_
tathaivaitad yajamānā etenaiva sūktena svargaṃ lokaṃ yanti
tad u vai ṣaḍṛcam_
ṣaḍ vā ṛtavaḥ_
ṛtūnām āptyai