Gopathabrahmana 1.2.15
Gopathabrāhmaṇa 1.2.15
- Language
- Sanskrit
1.2.15
aditir vai prajākāmaudanam apacat
tata ucchiṣṭam āśnāt
sā garbham adhatta
tata ādityā ajāyanta
ya eṣa odanaḥ pacyata ārambhaṇam evaitat kriyata ākramaṇam eva
prādeśamātrīḥ samidho bhavanti_
etāvān hy ātmā prajāpatinā saṃmitaḥ_
agner vai yā yajñiyā tanūr aśvatthe tayā samagacchata_
eṣāsya ghṛtyā tanūr yad ghṛtam_
yad ghṛtena samidho 'nakti tābhyām evainaṃ tat tanūbhyāṃ samardhayati
yan nirmārgasyādadhāty avagūrtyā vai vīryaṃ kriyate
yan nirmārgasyādadhāty avagūrtyā eva
saṃvatsaro vai prajananam
agniḥ prajananam
etat prajananam_
yat saṃvatsara ṛcāgnau samidham ādadhāti prajananād evainaṃ tat prajanayitā prajanayati_
abhaktartur vai puruṣaḥ_
na hi tad veda yam ṛtum abhijāyate
yan nakṣatraṃ tad āpnoti
ya eṣa odanaḥ pacyate yonir evaiṣā kriyate
yat samidha ādhīyante retas tad dhīyate
saṃvatsare vai reto hitaṃ prajāyate
yaḥ saṃvatsare paryete 'gnim ādhatte prajātam evainam ādhatte