Gopathabrahmana 2.2.4

2.2.4

ghṛtaṃ vai devā vajraṃ kṛtvā somam aghnan_
srucau bāhū
tasmāt srucau saumīm āhutiṃ nāśāte
avadhīyeta somas
tasmāt srucau cājyaṃ cāntikam āhārṣīt_
antikam iva khalu vā asyaitat pracaranti yat tānūnaptreṇa pracaranti_
aṃśur aṃśuṣ ṭe deva somāpyāyatām indrāyaikadhanavida ity āha
yad evāsyāpavāyate yan mīyate tad evāsyaitenāpyāyayanti_
ā tubhyam indraḥ pyāyatām ā tvam indrāya pyāyasvety āha_
ubhāv evendraṃ ca somaṃ cāpyāyayanti_
āpyāyayāsmānt sakhīnt sanyā medhayā prajayā dhanenety āha_
ṛtvijo vā etasya sakhāyas
tān evāsyaitenāpyāyayanti
svasti te deva soma sutyām udṛcam aśīyety āha_
āśiṣam evaitām āśāste
pra vā etasmāl lokāc cyavante ye somam āpyāyayanti_
antarikṣadevatyo hi soma āpyāyitaḥ_
eṣṭā rāya eṣṭā vāmāni preṣe bhagāya
ṛtam ṛtavādibhyo namo dive namaḥ pṛthivyā iti
dyāvāpṛthivībhyām eva namaskṛtyāsmiṃl loke pratitiṣṭhati pratitiṣṭhati || 4 ||