Gopathabrahmana 2.6.1

2.6.1

oṃ tān vā etān saṃpātān viśvāmitraḥ prathamam apaśyat_
<evā tvām indra vajrinn atra [ṚV 4.19.1]> <yan na indro jujuṣe yac ca vaṣṭi [ṚV 4.22.1]> <kathā mahām avṛdhat kasya hotuḥ [ṚV 4.23.1]>_iti
tān viśvāmitreṇa dṛṣṭān vāmadevo 'sṛjata
sa hekṣāṃ cakre viśvāmitro yān vā ahaṃ saṃpātān adarśaṃ tān vāmadevo 'sṛjata
kāni nv ahaṃ hi sūktāni saṃpātāṃs tat pratimānt sṛjeyam iti
sa etāni sūktāni saṃpātāṃs tat pratimān asṛjata
<sadyo ha jāto vṛṣabhaḥ kanīnaḥ [ṚV 3.48.1]>_<ud u brahmāṇy airata śravasyā [ṚV 7.23.1, ŚS 20.12.1]>_<abhi taṣṭeva dīdhayā manīṣām [ṚV 3.38.1]> iti viśvamitraḥ_
<indraḥ pūrbhid ātirad dāsam arkaiḥ [ṚV 3.34.1, ŚS 20.11.1]>_<ya eka id dhavyaś carṣaṇīnām [ṚV 6.22.1, ŚS 20.36.1]>_<yas tigmaśṛṅgo vṛṣabho na bhīmaḥ [ṚV 7.19.1, ŚS 20.37.1]>_iti vasiṣṭhaḥ_
<imām ū ṣu prabhṛtiṃ sātaye dhāḥ [ṚV 3.36.1]>_<icchanti tvā somyāsaḥ sakhāyaḥ [ṚV 3.30.1]> <śāsad vahnir duhitur naptyaṃ gāt [ṚV 3.31.1]>_iti bharadvājaḥ_
etair vai saṃpātair eta ṛṣaya imāṃl lokānt samapatan_
tad yat samapataṃs tasmāt saṃpātās
tat saṃpātānāṃ saṃpātatvam_
tato vā etāṃs trīn saṃpātān maitrāvaruṇo viparyāsam ekaikam aharahaḥ śaṃsaty <evā tvām indra vajrinn atra [ṚV 4.19.1]>_iti prathame 'hani
<yan na indro jujuṣe yac ca vaṣṭi [ṚV 4.22.1]>_iti dvitīye
<kathā mahām avṛdhat kasya hotuḥ [ṚV 4.23.1]>_iti tṛtīye
trīn eva saṃpātān brāhmaṇācchaṃsī viparyāsam ekaikam aharahaḥ śaṃsati_<indraḥ pūrbhid ātirad dāsam arkaiḥ [ṚV 3.34.1, ŚS 20.11.1]>_iti prathame 'hani
<ya eka id dhavyaś carṣaṇīnām [ṚV 6.22.1, ŚS 20.36.1]> iti dvitīye
<yas tigmaśṛṅgo vṛṣabho na bhīmaḥ [ṚV 7.19.1, ŚS 20.37.1]>_iti tṛtīye
trīn eva saṃpātān acchāvāko viparyāsam ekaikam aharahaḥ śaṃsati_<imām ū ṣu prabhṛtiṃ sātaye dhāḥ [ṚV 3.36.1]>_iti prathame 'hani_
<icchanti tvā somyāsaḥ sakhāyaḥ [ṚV 3.30.1]>_iti dvitīye
<śāsad vahnir duhitur naptyaṃ gāt [ṚV 3.31.1]>_iti tṛtīye
tāni vā etāni nava trīṇi cāharahaḥśaṃsyāni
tāni dvādaśa bhavanti