Gopathabrahmana 2.6.12

2.6.12

atha yad dvaipadau stotriyānurūpau bhavata <imā nu kaṃ bhuvanā sīṣadhāma [ṚV 10.157.1, ŚS 20.63.1, 20.124.4]>_iti
dvipād vai puruṣaḥ_
dvipratiṣṭhaḥ puruṣaḥ
puruṣo vai yajñas
tasmād dvaipadau stotriyānurūpau bhavataḥ_
atha sukīrtiṃ śaṃsaty <apendra prāco maghavann amitrān [PS 19.16.8a, ŚS 20.125.1a, sakalapāṭha at 2.6.4]> iti
devayonir vai sukīrtiḥ
sa ya evam etāṃ devayonyāṃ sukīrtiṃ veda kīrtiṃ pratiṣṭhāpayati bhūtānāṃ kīrtimān svarge loke pratitiṣṭhati
pratitiṣṭhati prajayā paśubhir ya evaṃ veda_
atha vṛṣākapiṃ śaṃsati <vi hi sotor asṛkṣata [ṚV 10.86.1, ŚS 10.126.1]>_iti_
ādityo vai vṛṣākapis
tad yat kampayamāno reto varṣati tasmād vṛṣākapis
tad vṛṣākaper vṛṣākapitvam_
vṛṣākapir iva vai sa sarveṣu lokeṣu bhāti ya evaṃ veda
tasya tṛtīyeṣu pādeṣv ādyantayor nyūṅkhaninardān karoti_
annaṃ vai nyūṅkhaḥ_ [ed. nyuṅkho, corr. Patyal]
balaṃ ninardaḥ_
annādyam evāsmai tad bale nidadhāti_
atha kuntāpaṃ śaṃsati
kuyaṃ ha vai nāma kutsitaṃ bhavati
tad yat tapati tasmāt kuntāpās
tat kuntāpānāṃ kuntāpatvam_
tapyante 'smai kuyāniti taptakuyaḥ svarge loke pratitiṣṭhati