Pramāṇa · Search · About · API

Jaiminīya (Talavakāra) Brāhmaṇa 3.188

Jaiminīyabrāhmaṇa 3.188

Language
Sanskrit

3.188

padena hāpeyāt
svaṃ vā yajñamabhyupeyād | idaṃ ca tvayā kṛtamiti vā
ta etamādityāssadyaḥkrīyaṃ yajñaṃ samabharan
te'bruvannagne ciraṃ tadyacchva | imāmeva vayaṃ tubhyamadya sutyāṃ prabrūmaḥ
teṣāṃ nastvaṃ hotāsi | gaurāṃgiraso'dhvaryur | bṛhaspatirudgātā ayāsyo
brahmeti sarvānavṛṇata
so'bravīddūto vā ahaṃ carāmīti
tamagniṃ dūtaṃ vṛṇīmaha ityeva dūtaṃ carantamavṛṇata
sa eṣāṃ vṛto nāpākrāmat
sa punaretyābravīd | aṅgirasa | ādityā vo'dyasutyāṃ prāhuriti
tena hātureva no'vṛthā iti
neti hovāca
dūto yuṣmākamabhūvaṃ | vṛta evāmīṣāmasmy | ādaha nūnamamī
yuṣaṃnmedhāvitarā vā dhīratarā vābhūvanya etadpūrve dṛśanniti
te vṛtā nāpākrāman
ta etyāyājayan
tebhya etamādityā ādityamevāśvaṃ śvetaṃ bhūtamaśvābhidhānyabhihitamayāsyāya
brahmāśvaṃ nītvā svargaṃ lokamagacchan
ahīyantāṅgirasaḥ
so'yāsyassadṛśāvātmana śreyāṃsaṃ vā pratigṛhya vyabhraṃśata
so'kāmayata samātmānaṃ śrīṇīyeti
sa etatsāmāpaśyat
tenātmānaṃ samaśrīṇīta
vibhraṣṭamivaitadaharyatsaptamam
tadyadatrāyāsyaṃ bhavati samevainadetena śrīṇanti | bhiṣajyantyevainametena
yadvayāsyo'paśyattasmādāyāsyamityākhyāyate
pro ayāsīdindurindrasya niṣkṛtam
iti pravadṛcā ca sāmnā caitadahaḥ praṇayanti
ubhau varṇau samṛddhyai
preti bhṛgavaḥ prtyaṅgirasaḥ pretyādityā svargaṃ lokamārohan
pretyevaitena svargaṃ lokamārohanti