Pramāṇa · Search · About · API

Jaiminīya (Talavakāra) Brāhmaṇa 3.213

Jaiminīyabrāhmaṇa 3.213

Language
Sanskrit

3.213

abhi somāsa āyava
ityabhīti bhavati rathantarasya rūpam
rāthantarametadahaḥ
pavante madyaṃ madam
samudrasyādhi viṣṭape manīṣiṇo matsarāso madacyutaḥ
iti samudravatīrbhavanti | chandomānāṃ rūpam
samudro vai chandomāḥ
taratsamudraṃ pavamāna ūrmiṇā rājā deva ṛtaṃ bṛhat
arṣā mitrasya varuṇasya dharmaṇā pra hinvāna ṛtaṃ bṛhat
nṛbhiryemāṇo hariyato vicakṣaṇo rājā devassamudriyaḥ
iti caturṛcaṃ bhavati catuṣpadā vai paśavaḥ
paśavaśchandomāḥ paśūnāmevāvaruddhyai
tāsu dvihiṃkāraṃ vāmadevyam
paśavo vai simāḥ
paśavo revatayaḥ
paśavo dvihiṃkāraṃ vāmadevyam
paśumanta eva bhavantyenena tuṣṭuvānāḥ
prajāpatiḥ paśūnasṛjata
te'smātsṛṣṭā asaṃjānānā apākrāman
so'krāmayatābhi mā paśavassaṃjānīran
na madapakrāmeyuriti
sa etatsāmāpaśyat
tenāstuta
tato vai taṃ paśavo'bhisamajānata
tato'smādanapakrāmiṇo'bhavan
taddvihiṃkāraṃ bhavati
humiti vai paśavassaṃjānate | humiti mātā putramabhyeti | humiti putro
mātaram
tadetatsaṃjñānaṃ paśūnāṃ sāma
abhyenaṃ paśavassaṃjānate | nāsmātpaśavo'pakrāmanti ya evaṃ veda
tadaiḷaṃ bhavati paśavo vā iḷā | paśavaśchandomāḥ paśūnāmevāvaruddhyai