Pramāṇa · Search · About · API

Mantrabrahmana 1.1

Mantrabrāhmaṇa 1.1

Language
Sanskrit

1.1.1

deva savitaḥ prasuva yajñaṃ
prasuva yajñapatiṃ bhagāya /
divyo gandharvaḥ ketapūḥ ketaṃ naḥ punātu
vācaspatir vācaṃ naḥ svadatu //

1.1.2

kāma veda te nāma mado nāmāsi
samānayāmum̐ surā te abhavat /
param atra janmāgne tapaso nirmito 'si // svāhā //

1.1.3

imaṃ ta upasthaṃ madhunā sam̐sṛjāmi
prajāpater mukham etad dvitīyam /
tena pum̐so 'bhibhavāsi sarvān
avaśān vaśiny asi rājñī // svāhā //

1.1.4

agniṃ kravyādam akṛṇvan guhānāḥ
strīṇām upastham ṛṣayaḥ purāṇāḥ /
tenājyam akṛṇvam̐s traiśṛṇgaṃ tvāṣṭraṃ
tvayi tad dadhātu // svāhā //

1.1.5

yā akṛṇtann avayan yā atanvata
yāś ca devyo antān abhito 'dadanta /
tās tvā devyo jarasā sam̐vyayantv
āyuṣmatīdaṃ paridhatsva vāsaḥ //

1.1.6

paridhatta dhatta vāsasainām̐
śatāyuṣīṃ kṛṇuta dīrgham āyuḥ /
śataṃ ca jīva śaradaḥ suvarcā
vasūni cārye vibhajāsi jīvan //

1.1.7

somo 'dadad gandharvāya
gandharvo 'dadad agnaye /
rayiṃ ca putrām̐ś cādād
agnir mahyam atho imām //

1.1.8

pra me patiyānaḥ panthāḥ kalpatām̐
śivā ariṣṭā patilokaṃ gameyam //

1.1.9

prāsyāḥ patiyānaḥ panthāḥ kalpatām̐
śivā ariṣṭā patilokaṃ gamyāḥ //

1.1.10

agnir etu prathamo devatābhyaḥ
so 'syai prajāṃ muñcatu mṛtyupāśāt /
tad ayam̐ rājā varuṇo 'numanyatām̐
yatheyam̐ strī pautram aghaṃ na rodāt // svāhā //

1.1.11

imām agnis trāyatāṃ gārhapatyaḥ
prajām asyai jaradaṣṭiṃ kṛṇotu /
aśūnyopasthā jīvatām astu mātā
pautram ānandam abhivibudhyatām iyam̐ // svāhā //

1.1.12

dyaus te pṛṣtham̐ rakṣatu
vāyur ūrū aśvinau ca /
stanaṃdhayān te putrānt savitābhirakṣatv
ā vāsasaḥ paridhānād bṛhaspatir
viśve devā abhirakṣantu paścāt // svāhā //

1.1.13

mā te gṛheṣu niśi ghoṣa utthād
anyatra tvad rudatyaḥ sam̐viśantu /
mā tvam̐ rudaty ura ābādhiṣṭhā
jīvapatnī patiloke virāja
paśyantī prajām̐ sumanasyamānām̐ // svāhā //

1.1.14

aprajasyaṃ pautramṛtyuṃ
pāpmānam uta vāgham /
śīrṣṇaḥ srajam ivonmucya
dviṣadbhyaḥ pratimuñcāmi pāśam̐ // svāhā //

1.1.15

paraitu mṛtyur amṛtaṃ ma āgād
vaivasvato na abhayaṃ kṛṇotu /
paraṃ mṛtyo anuparehi panthām̐
yatra no anya itaro devayānāt /
cakṣuṣmate śṛṇvate te bravīmi
mā naḥ prajām̐ rīriṣo mota vīrānt // svāhā //

Commentaries (1)

Linked texts (5)