Pramāṇa · Search · About · API

Mantrabrahmana 1.3

Mantrabrāhmaṇa 1.3

Language
Sanskrit

1.3.1

lekhāsaṃdhiṣu pakṣmasv
āvarteṣu ca yāni te /
tāni te pūrṇāhutyā
sarvāṇi śamayāmy aham //

1.3.2

keśeṣu yac ca pāpakam
īkṣite rudite ca yat /
tāni te pūrṇāhutyā
sarvāṇi śamayāmy aham //

1.3.3

śīle ca yac ca pāpakaṃ
bhāṣite hasite ca yat /
tāni te pūrṇāhutyā
sarvāṇi śamayāmy aham //

1.3.4

ārokeṣu ca danteṣu
hastayoḥ pādayoś ca yat /
tāni te pūrṇāhutyā
sarvāṇi śamayāmy aham //

1.3.5

ūrvor upasthe jaṅghayoḥ
saṃdhāneṣu ca yāni te /
tāni te pūrṇāhutyā
sarvāṇi śamayāmy aham //

1.3.6

yāni kāni ca ghorāṇi
sarvāṅgeṣu tavābhavan /
pūrṇāhutibhir ājyasya
sarvāṇi tāny aśīśamam //

1.3.7

dhruvā dyaur dhruvā pṛthivī
dhruvam̐ viśvam idaṃ jagat /
dhruvāsaḥ parvatā ime
dhruvā strī patikule ^ iyam //

1.3.8

annapāśena maṇinā
prāṇasūtreṇa pṛśninā /
badhnāmi satyagranthinā
manaś ca hṛdayaṃ ca te //

1.3.9

yad etad dhṛdayaṃ tava
tad astu hṛdayaṃ mama /
yad idam̐ hṛdayaṃ mama
tad astu hṛdayaṃ tava //

1.3.10

annaṃ prāṇasya paḍvim̐śas
tena badhnāmi tvāsau //

1.3.11

sukim̐śukam̐ śalmalim̐ viśvarūpam̐
suvarṇavarṇam̐ sukṛtam̐ sucakram /
āroha sūrye amṛtasya nābhim̐
syonaṃ patye vahatuṃ kṛṇuṣva //

1.3.12

mā vidan paripanthino
ya āsīdanti dampatī /
sugebhir durgam atītām
apadrāntv arātayaḥ //

1.3.13

iha gāvaḥ prajāyadhvam
ihāśvā iha pūruṣāḥ /
iho sahasradakṣiṇo
'pi pūṣā niṣīdatu //

1.3.14

iha dhṛtir iha svadhṛtir
iha rantir iha ramasva /
mayi dhṛtir mayi svadhṛtir
mayi ramo mayi ramasva //

Commentaries (1)

Linked texts (3)