Pañcaviṃśa (Tāṇḍya Mahā) Brāhmaṇa 192

192

(PB 18.1.1) saptadaśo 'gniṣṭomaḥ
(PB 18.1.2) devāś ca vā asurāś ca prajāpater dvayāḥ putrā āsaṃs te 'surā bhūyāṃso balīyāṃsa āsan kanīyāṃso devās te devāḥ prajāpatim upādhāvan sa etam upahavyam apaśyat
(PB 18.1.3) sa aikṣata yan niruktam āhariṣyāmy asurā me yajñaṃ haniṣyantīti so 'niruktam āharat
(PB 18.1.4) sa uttame stotre ''devo vo draviṇodā'' iti devān abhiparyāvartata
(PB 18.1.5) tato devā abhavan parāsurāḥ
(PB 18.1.6) bhavaty ātmanā parāsya bhrātṛvyo bhavati ya evaṃ veda
(PB 18.1.7) atho khalv āhuḥ ''yajñāyajñā vo agnaya'' ity eva kāryam
(PB 18.1.8) agnir vai sarvā devatās tena na devatānāṃ kāṃ canāntar eti
(PB 18.1.9) indro yatīn sālāvṛkeyebhyaḥ prāyacchat tam aślīlā vāg abhyavadat sa prajāpatim upādhāvat tasmā etam upahavyaṃ prāyacchat taṃ viśve devā upāhvayanta tasmād upahavyaḥ
(PB 18.1.10) abhiśasyamānaṃ yājayet
(PB 18.1.11) devatā vā etaṃ parivrajanti yam anṛtam abhiśaṃsanti devatā evāsyānnam ādayanti
(PB 18.1.12) tasya pūtasya svaditasya manuṣyā annam adanti
(PB 18.1.13) grāmakāmo yajeta
(PB 18.1.14) mārutī bhavati marutau vai devānāṃ viśo viśam evāsmā anuniyunakty anapakrāmukāsmād viḍ bhavati
(PB 18.1.15) paśukāmo yajeta pauṣī bhavati
(PB 18.1.16) paśavo vai pūṣā paśūn evāvarundhe
(PB 18.1.17) vaiśvadevī bhavati viśve hy enaṃ devā upāhvayanta
(PB 18.1.18) bṛhatsāmā bhavati
(PB 18.1.19) prajāpatir hy enam indrāya prāyacchat
(PB 18.1.20) aśvaḥ śyavo dakṣiṇā
(PB 18.1.21) sa hy aniruktaḥ
(PB 18.1.22) sa brahmaṇe deyaḥ
(PB 18.1.23) brahmā vā ṛtvijām aniruktaḥ svenaivainaṃ tad rūpeṇa samardhayati
(PB 18.1.24) yāvad dha vai kumāre sadyo jāta eno nāsmiṃs tāvac ca naino bhavati ya evaṃ veda