Pañcaviṃśa (Tāṇḍya Mahā) Brāhmaṇa 258

258

(PB 22.7.1) abhyāsaṅgyaḥ pañcāho 'tha trayastriṃśām ahas tasya catustriṃśo 'gniṣṭomaḥ saptadaśaṃ mahāvratam atirātras tasya caturviṃśaṃ bahiṣpavamānaṃ trivṛc chiraḥ pañcadaśau pakṣau saptadaśa ātmaikaviṃśaṃ puccham
(PB 22.7.2) etena vai jamadagniḥ sarvān poṣān apuṣyat sarvān evaitena poṣān puṣyati
(PB 22.7.3) yad abhyāsaṅgyaḥ pañcāhaḥ purastād bhavati santatyā eva
(PB 22.7.4) athaitat trayastriṃśam ahas trayastriṃśad devatā devatā evāpnoti
(PB 22.7.5) tasya catustriṃśo 'gniṣṭomaḥ prajāpatiś catustriṃśo devatānāṃ prajāpatim evāpnoti
(PB 22.7.6) caturviṃśaṃ bahiṣpavamānaṃ bhavati mahāvratasya caturviṃśatyakṣarā gāyatrī prajananaṃ gāyatrī prajātyai
(PB 22.7.7) ubhaye stomā yugmantaś cāyujaś ca tan mithunaṃ tasmān mithunāt prajāyate
(PB 22.7.8) yat trivṛc chiro bhavati nava prāṇāḥ prāṇeṣv eva pratitiṣṭhati yat pañcadaśau pakṣau savīvadhatvāya saptadaśa ātmā bhavati prajāpatir vai saptadaśaḥ prajāpatim evāpnoty ekaviṃśaṃ pucchaṃ bhavati pratiṣṭhityai