Pañcaviṃśa (Tāṇḍya Mahā) Brāhmaṇa 314

314

(PB 25.1.1) atirātraś caturviṃśaṃ prāyaṇīyam ahar dvau trivṛt pañcadaśau ṣaḍahau pṛṣṭhyaḥ ṣaḍaho dvau trivṛt pañcadaśau ṣaḍahau sa māsaḥ sa dvitīyaḥ sa tṛtīyaḥ sa caturthaḥ sa pañcamas trayas trivṛt pañcadaśāḥ ṣaḍahāḥ pṛṣṭhyaḥ ṣaḍahas trivṛd bṛhaspatistomas trayaḥ svarasāmāno divākīrtyam ahas trayaḥ svarasāmānaḥ pañcadaśa indrastoma ukthyaḥ pṛṣṭyaḥ ṣaḍahas trayastriṃśārambhaṇa ekaḥ pañcadaśas trivṛt ṣaḍaho dvādaśāhasya daśāhāni vyūḍhā agniṣṭomās trivṛta udbhic ca balabhic ca dve ahanī dvau pañcadaśatrivṛtau ṣaḍahau pṛṣṭhyaḥ ṣaḍaho dvau pañcadaśatribṛtau ṣaḍahau sa māsaḥ sa dvitīyaḥ sa tṛtīyaḥ sa caturthaḥ pañcadaśatrivṛt ṣaḍahaḥ pṛṣṭhyaḥ ṣaḍahaḥ pañcadaśatrivṛt ṣaḍaho gauś cāyuś ca dve ahanī chandomadaśāho 'ṣṭācatvāriṃśaṃ prathamam ahar atha catuścatvāriṃśaṃ catvāriṃśaṃ ṣaṭtriṃśaṃ dvātriṃśaṃ triṃśaṃ dve aṣṭāviṃśe pañcaviṃśaṃ caturviṃśaṃ mahāvrataṃ cātirātraś ca
(PB 25.1.2) ādityānām madhye pṛṣṭhyam
(PB 25.1.3) madhye pṛṣṭhyena vā ādityāḥ svargaṃ lokam ākramanta yan madhye pṛṣṭhāny upayanti svargasya lokasyākrāntyai
(PB 25.1.4) annaṃ vai pṛṣṭhāny annam eva tan madhyato dhīyate tasmān madhye sad annaṃ dhinoti
(PB 25.1.5) paśavaḥ pṛṣṭhāni paśuṣv eva pratitiṣṭhanti
(PB 25.1.6) cakre vā ete sākaṃvṛtīyat trivṛt pañcadaśau stomau yaṃ kāmaṃ kāmayante tam etenābhyaśnuvate yatra yatra hi cakrīvatā kāmayate tat tad abhyaśnute
(PB 25.1.7) athaiṣa trivṛd bṛhaspatistoma etena vai bṛhaspatir devānāṃ purodhām agacchat purodhakāmā upeyur gacchanti purodhāṃ pura enān dadhate
(PB 25.1.8) athaite svarasāmānaḥ śiro vai divākīrtyaṃ prāṇāḥ svarasāmāno yad divākīrtyam abhitaḥ svarasāmāno bhavanti śivasyeva tat prāṇā dhīyante
(PB 25.1.9) athaiṣa pañcadaśa indrastoma ukthya etena vā indro 'tyanyā devatā abhavad atyanyāḥ prajā bhavanti ya etad upayanti
(PB 25.1.10) athaitāni dvādaśāhasya daśāhāni vyūḍhā agniṣṭomās trivṛto madhyataḥ pāpmano mucyanta eṣa vāva devatalpo devatalpam eva tad ārohanti talpyā bhavanti pravasīyasas talpam āpnuvanti
(PB 25.1.11) athaitāv udbhidbalabhidāv etābhyāṃ vai bṛhaspatir devebhyaḥ paśūn udasṛjat paśūn evaitābhyām utsṛjante
(PB 25.1.12) athaite go āyuṣī mithunau stomāv upayanti prajātyai
(PB 25.1.13) athaiṣa chandomadaśāhaś chandasāṃ doho 'rvāñci chandāṃsy upayanti tasmād arvāñco bhuñjantaḥ paśava upatiṣṭhante
(PB 25.1.14) athaid vratam annaṃ vai vrataṃ na vā anyatra mukhād annaṃ dhinoti yad upariṣṭād vratam upayanti mukhata eva tad annādyaṃ dhīyate tasmān mukhe sad annaṃ dhinoti
(PB 25.1.15) athaitau prāyaṇīyodayanīyāv atirātrau yenaiva prāṇena prayanti tam abhyudyanti