Pañcaviṃśa (Tāṇḍya Mahā) Brāhmaṇa 316

316

(PB 25.3.1) atirātras trivṛtā māsaṃ pañcadaśena māsaṃ saptadaśena māsam ekaviṃśena māsaṃ triṇavena māsaṃ trayastriṃśena māsaṃ mahāvrataṃ trayastriṃśena māsaṃ triṇavena māsam ekaviṃśena māsaṃ saptadaśena māsaṃ pañcadaśena māsaṃ trivṛtā māsam atirātraḥ
(PB 25.3.2) ṛtavo na pratyatiṣṭhaṃs ta etena pratyatiṣṭhan pratiṣṭhākāmā upeyuḥ praty eva tiṣṭhanti ṣaḍ vā ṛtava ṛtuṣv evaitena pratitiṣṭhanti
(PB 25.3.3) yad gataṃ madhyata upayanti madhyata eva tad annādyaṃ dhīyate tasmān madhye dhinoti
(PB 25.3.4) pakṣi vā etat sattrāyaṇaṃ yaṃ kāmaṃ kāmayante tam etenābhyaśnuvate yatra yatra hi pakṣī kāmayate tat tad abhyaśnute
(PB 25.3.5) trivṛtā prayanti trivṛtodyanti prāṇā vai trivṛt stomānāṃ prāṇair eva prayanti prāṇeṣu pratitiṣṭhanti
(PB 25.3.6) etad vai dṛtivātavantau khāṇdava upeto viṣuvati vātavān uttiṣṭhati samāpayati dṛtis tasmāt tanīyāṃso vātavatā bhūyāṃso dārteyāḥ