Pañcaviṃśa (Tāṇḍya Mahā) Brāhmaṇa 97

97

(PB 10.1.1) agninā pṛthivyauṣadhibhis tenāyaṃ lokas trivṛd vāyunāntarikṣeṇa vayobhis tenaiṣa lokās trivṛd yo 'yam antar ādityena divā nakṣatrais tenāsau lokas trivṛd etad eva trivṛta āyatanam eṣāsya bandhutā
(PB 10.1.2) āyatanavān bandhumān bhavati ya evaṃv veda
(PB 10.1.3) tam u pratiṣṭhetyāhus trivṛd dhy evaiṣu lokeṣu pratiṣṭhitaḥ
(PB 10.1.4) ardhamāsa eva pañcadaśasyāyatanam eṣāsya bandhutā
(PB 10.1.5) āyatanavān bandhumān bhavati ya evaṃv veda
(PB 10.1.6) taṃ caujo balam ity āhur ardhamāsaśo hi prajāḥ paśava ojo balaṃ puṣyanti
(PB 10.1.7) saṃvatsara eva saptadaśasyāyatanaṃ dvādaśa māsāḥ pañcadartava etad eva saptadaśasyāyatanam eṣāsya bandhutā
(PB 10.1.8) āyatanavān bandhumān bhavati ya evaṃv veda
(PB 10.1.9) tam u prajāpatir ity āhuḥ saṃvatsaraṃ hi prajāḥ paśavo 'nuprajāyante
(PB 10.1.10) āditya evaikaviṃsasyāyatanaṃ dvādaśa māsāḥ pañcavartas traya ime lokā asāv āditya ekaviṃśa etad evaikaviṃśasyāyatanam eṣāsya bandhutā
(PB 10.1.11) āyatanavān bandhumān bhavati ya evaṃv veda
(PB 10.1.12) tam u devatalpa ity āhuḥ pra devatalpam āpnoti ya evaṃv veda
(PB 10.1.13) trivṛd eva triṇavasyāyatanam eṣāsya bandhutā
(PB 10.1.14) āyatanavān bandhumān bhavati ya evaṃv veda
(PB 10.1.15) tam u puṣṭir ity āhus trivṛd dhy evaiṣa puṣṭaḥ
(PB 10.1.16) devatā eva trayastriṃśasyāyatanaṃ trayastriṃśad devatāḥ prajāpatiś catustriṃśa etad eva trayastriṃśasyāyatanam eṣāsya bandhutā
(PB 10.1.17) āyatanavān bandhumān bhavati ya evaṃv veda
(PB 10.1.18) tam u nāka ity āhur na hi prajāpatiḥ kasmai canākam
(PB 10.1.19) chandāṃsy eva chandomānām āyatanam eṣaiṣāṃ bandhutā
(PB 10.1.20) āyatanavān bandhumān bhavati ya evaṃv veda
(PB 10.1.21) tān u puṣṭir ity āhuḥ paśavo hi chandomāḥ