Pramāṇa · Search · About · API

Taittiriyabrahmana 1.1.2

Taittirīyabrāhmaṇa 1.1.2

Language
Sanskrit

1.1.2.1

kṛ́ttikāsv agním ā́dadhīta /
etád vā́ agnér nákṣatram /
yát kṛ́ttikāḥ /
svā́yām eváinaṃ devátāyām ādhā́ya /
brahmavarcasī́ bhavati /
múkhaṃ vā́ etán nákṣatrāṇām /
yát kṛ́ttikāḥ /
yáḥ kṛ́ttikāsv agním ādhatté /
múkhya evá bhavati /
átho khálu //

1.1.2.2

agninakṣatrám íty ápacāyanti /
gṛhā́n ha dā́huko bhavati /
prajā́patī rohiṇyā́m agním asṛjata /
táṃ devā́ rohiṇyā́m ā́dadhata /
táto vái té sárvān róhān arohan /
tád rohiṇyái rohiṇitvám /
yó rohiṇyā́m agním ādhatté /
ṛdhnóty evá /
sárvān róhān rohati /
devā́ vái bhadrā́ḥ sánto 'gním ā́dhitsanta //

1.1.2.3

téṣām ánāhito 'gnír ā́sīt /
áthaibhyo vāmáṃ vásv ápākrāmat /
té púnarvasvor ā́dadhata /
táto vái tā́n vāmáṃ vásūpā́vartata /
yáḥ purā́ bhadráḥ sán pā́pīyānt syā́t /
sá púnarvasvor agním ā́dadhīta /
púnar eváinaṃ vāmáṃ vásūpā́vartate /
bhadró bhavati /
yáḥ kāmáyeta dā́nakāmā me prajā́ḥ syur íti /
sá pū́rvayoḥ phálgunyor agním ā́dadhīta //

1.1.2.4

aryamṇó vā́ etán nákṣatram /
yát pū́rve phálgunī /
aryamā́_íti tám āhur yó dádāti /
dā́nakāmā asmai prajā́ bhavanti /
yáḥ kāmáyeta bhagī́ syām íti /
sá úttarayoḥ phálgunyor agním ā́dadhīta /
bhágasya vā́ etán nákṣatram /
yád úttare phálgunī /
bhagy èva bhavati /
kālakañjā́ vái nā́ma_ásurā āsan //

1.1.2.5

té suvargā́ya lokā́ya_agním acinvanta /
púruṣa íṣṭakām úpādadhāt púruṣa íṣṭakām /
sá índro brāhmaṇó brúvāṇa íṣṭakām úpādhatta /
eṣā́ me citrā́ nā́méti /
té suvargám̐ lokám āprā́rohan /
sá índra íṣṭakām ā́vṛhat /
té 'vākīryanta /
yè 'vā́kīryanta /
tá ū́rṇāvábhayo 'bhavan /
dvā́v údapatatām //

1.1.2.6

táu divyáu śvā́nāv abhavatām /
yó bhrā́tṛvyavānt syāt /
sá citrā́yām agním ā́dadhīta /
avakī́rya_evá bhrā́tṛvyān /
ójo bálam indriyáṃ vīryàm ātmán dhatte /
vasántā brāhmaṇò 'gním ā́dadhīta /
vasantó vái brāhmaṇásya_ṛtúḥ /
svá eváinam ṛtā́v ādhā́ya /
brahmavarcasī́ bhavati /
múkhaṃ vā́ etád ṛtūnā́m //

1.1.2.7

yád vasantáḥ /
yó vasánta_agním ādhatté /
múkhya evá bhavati /
átho yónimantam eváinaṃ prájātam ā́dhatte /
grīṣmé rājanyà ā́dadhīta /
grīṣmó vái rājanyàsya_ṛtúḥ /
svá eváinam ṛtā́v ādhā́ya /
indriyāvī́ bhavati /
śarádi váiśya ā́dadhīta /
śarád vái váiśyasya_ṛtúḥ //

1.1.2.8

svá eváinam ṛtā́v ādhā́ya /
paśumā́n bhavati /
ná pū́rvayoḥ phálgunyor agním ā́dadhīta /
eṣā́ vái jaghanyā̀ rā́triḥ saṃvatsarásya /
yát pū́rve phálgunī /
pṛṣṭitá evá saṃvatsarásya_agním ādhā́ya /
pā́pīyān bhavati /
úttarayor ā́dadhīta /
eṣā́ vái prathamā́ rā́triḥ saṃvatasarásya /
yád úttare phálgunī /
mukhatá evá saṃvatsarásya_agním ādhā́ya /
vásīyān bhavati /
átho khálu /
yadā́_eváinaṃ yajñá upanámet /
átha_ā́dadhīta /
sáivā́sya_ṛ́ddhiḥ //

Commentaries (4)

Linked texts (8)