Taittiriyabrahmana 1.2.4
Taittirīyabrāhmaṇa 1.2.4
- Language
- Sanskrit
1.2.4.1
ekavim̐śá eṣá bhavati /
eténa vái devā́ ekavim̐śéna /
ādityám itá uttamám̐ suvargáṃ lokám ā́rohayann /
sá vā́ eṣá itá ekavim̐śáḥ /
tásya dáśāvástād áhāni /
dáśa parástāt /
sá vā́ eṣá virā́jy ubhayátaḥ prátiṣṭhitaḥ /
virā́ji hí vā́ eṣá ubhayátaḥ prátiṣṭhitaḥ /
tásmād antarémáu lokáu yán /
sárveṣu suvargéṣu lokéṣv abhitápann eti //
1.2.4.2
devā́ vā́ ādityásya suvargásya lokásya /
párāco 'tipādā́d abibhayuḥ /
táṃ chándobhir adṛm̐han dhṛ́tyai /
devā́ vā́ ādityásya suvargásya lokásya /
ávāco 'vapādā́d abibhayuḥ /
táṃ pañcábhī raśmíbhir údavayann /
tásmād ekavim̐śé 'han páñca divākīrtyā̀ni kriyante /
raśmáyo vái divākīrtyā̀ni /
yé gāyatré /
té gāyatrī́ṣū́ttarayoḥ pávamānayoḥ //
1.2.4.3
mahā́divākīrtyam̐ hótuḥ pṛṣṭhám /
vikarṇáṃ brahmasāmá /
bhā́so 'gniṣṭomáḥ /
áthaitā́ni párāṇi /
párair vái devā́ ādityám̐ suvargáṃ lokám apārayann /
yád ápārayann /
tát párāṇāṃ paratvám /
pāráyanty enaṃ párāṇi /
yá eváṃ véda /
áthaitā́ni spárāṇi /
spárairvái devā́ ādityám̐ suvargáṃ lokám aspārayann /
yád áspārayann /
tát spárāṇām̐ sparatvám /
spāráyanty enam̐ spárāṇi /
yá eváṃ véda //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Kāṭhakaśākhā — Sanskrit
- The Religion and Philosophy of the Veda and Upanishads — Arthur Berriedale Keith, English
- Die Kosmographie der Inder nach den Quellen dargestellt — Willibald Kirfel, German
- Kāṭhakasaṃhitā — Sanskrit