Pramāṇa · Search · About · API

Taittiriyabrahmana 1.5.11

Taittirīyabrāhmaṇa 1.5.11

Language
Sanskrit

1.5.11.1

yé vái catvā́raḥ stómāḥ /
kṛtáṃ tát /
átha yé páñca /
káliḥ sáḥ /
tásmāc cátuṣṭomaḥ /
tác catuṣṭomasya catuṣṭomatvám /
tád āhuḥ /
katamā́ni tā́ni jyótīm̐ṣi /
yá etásya stómā íti /
trivṛ́t pañcadaśáḥ saptadaśá ekavim̐śáḥ //

1.5.11.2

etā́ni vā́vá tā́ni jyótīm̐ṣi /
yá etásya stómāḥ /
sò 'bravīt /
saptadaśéna hriyámāṇo vyàleśiṣi /
bhiṣájyata mā_íti /
tám aśvinau dhānā́bhir abhiṣajyatām /
pūṣā́ karambhéṇa /
bhā́ratī parivāpéṇa /
mitrā́váruṇau payasyàyā /
tád āhuḥ //

1.5.11.3

yád aśvíbhyāṃ dhānā́ḥ /
pūṣṇáḥ karambháḥ /
bhā́ratyai parivāpáḥ /
mitrā́váruṇayoḥ payasyā́tha /
kásmād etéṣām̐ havíṣām índram evá yajanti_íti /
etā́ hy enáṃ devátā íti brūyāt /
etáir havírbhir ábhiṣajyam̐s tásmād íti /
táṃ vásavo 'ṣṭā́kapālena prātaḥsavanè 'bhiṣajyan /
rudrā́ ékādaśakapālena mā́dhyandine sávane /
víśve devā́ dvā́daśakapālena tṛtīyasavané //

1.5.11.4

sá yád aṣṭā́kapālān prātaḥsavané kuryāt /
ékādaśa kapālā́n mā́dhyandine sávane /
dvā́daśakapālām̐s tṛtīyasavané /
víloma tád yajñásya kriyeta /
ékādaśakapālān evá prātaḥsavane kuryāt /
ékādaśakapālān mā́dhyandine sávane /
ékādaśakapālām̐s tṛtīyasavané /
yajñásya salomatvā́ya /
tád āhuḥ /
yád vásūnāṃ prātaḥsavanám /
rudrā́ṇāṃ mā́dhyandinam̐ sávanam /
víśveṣāṃ devā́nāṃ tṛtīyasavanám /
átha kásmād etéṣām̐ havíṣām índram evá yajanti_íti /
etā́ hy enaṃ devátā íti brūyāt /
etáir havírbhir ábhiṣajyam̐s tásmād íti //

Commentaries (5)

Discussed in (5)