Pramāṇa · Search · About · API

Taittiriyabrahmana 1.6.2

Taittirīyabrāhmaṇa 1.6.2

Language
Sanskrit

1.6.2.1

vaiśvadevéna vái prajā́patiḥ prajā́ asṛjata /
tā́ḥ sṛṣṭá ná prā́jāyanta /
sò 'gnir akāmayata /
ahám imā́ḥ prájanayeyam íti /
sá prajā́pataye /
śúcam adadhāt /
sò 'śocat prajā́m icchámānaḥ /
tásmād yáṃ ca prajā́ bhunákti yáṃ ca ná /
tā́v ubháu śocataḥ prajā́m icchámānau /
tā́sv agním ápyasṛjat /
tā́ agnír ádhyait //

1.6.2.2

sómo réto 'dadhāt /
savitā́ prā́janayat /
sárasvatī vā́cam adadhāt /
pūṣā́_apoṣayat /
té vā́ eté tríḥ saṃvatsarásya práyujyante /
yé devā́ḥ púṣṭipatayaḥ /
saṃvatsaró vái prajā́patiḥ /
saṃvatsaréṇa_evā́smai prajā́ḥ prā́janayat /
tā́ḥ prajā́ jātā́ marúto 'ghnan /
asmā́n ápi ná prāyukṣata_íti //

1.6.2.3

sá etáṃ prajā́patir mārutám̐ saptákapālam apaśyat /
táṃ níravapat /
táto vái prajā́bhyo 'kalpata /
yán māruto nirupyáte /
yajñásya kŀ̥ptyai /
prajā́nām ághātāya /
saptákapālo bhavati /
saptágaṇā vái marútaḥ /
gaṇaśá evā́smai víśaṃ kalpayati /
sá prajā́patir aśocat //

1.6.2.4

yā́ḥ pū́rvāḥ prajā́ ásṛkṣi /
marútas tā́ avadhiṣuḥ /
kathám áparāḥ sṛjeyā_íti /
tásya śúṣma āṇḍáṃ bhūtáṃ níravartata /
tád vyúdaharat /
tád apoṣayat /
tát prā́jāyata /
āṇḍásya vā́ etád rūpám /
yád āmíkṣā /
yád vyuddhárati //

1.6.2.5

prajā́ evá tád yájamānaḥ poṣayati /
vaiśvadevy ā̀míkṣā bhavati /
vaiśvadevyò vái prajā́ḥ /
prajā́ evā́smai prájanayati /
vā́jinam ā́nayati /
prajā́sv evá prájātāsu réto dadhāti /
dyāvāpṛthivyà ékakapālo bhavati /
prajā́ evá prájātā dyā́vāpṛthivī́bhyām ubhayátaḥ párigṛhṇāti /
deva_asurā́ḥ sáṃyattā āsan /
sò 'gnír abravīt //

1.6.2.6

mā́m ágre yajata /
máyā múkhena_ásurāñ jeṣyatha_íti /
mā́ṃ dvitī́yam íti sómo 'bravīt /
máyā rā́jñā jeṣyatha_íti /
mā́ṃ tṛtī́yam íti savitā́ /
máyā prásūtā jeṣyatha_íti /
mā́ṃ caturthī́m íti sárasvatī /
indriyáṃ vo 'háṃ dhāsyāmi_íti mā́ṃ pañcamám íti pūṣā́ /
máyā pratiṣṭháyā jeṣyatha_íti //

1.6.2.7

tè 'gnínā múkhena_ásurān ajayan /
sómena rā́jñā /
savitrā́ prásūtāḥ /
sárasvatī_indriyám adadhāt /
pūṣā́ pratiṣṭhā́_āsīt /
táto vái devā́ vyajayanta /
yád etā́ni havī́m̐ṣi nirupyánte víjityai /
ná_uttaravedím úpavapati /
paśávo vā́ uttaravedíḥ /
ájātā iva hy ètárhi paśávaḥ //

Commentaries (4)

Linked texts (5)