Pramāṇa · Search · About · API

Taittiriyabrahmana 1.6.4

Taittirīyabrāhmaṇa 1.6.4

Language
Sanskrit

1.6.4.1

prajā́patiḥ savitā́ bhūtvā́ prajā́ asṛjata /
tā́ enam átyamanyanta /
tā́ asmād ápākrāman /
tā́ váruṇo bhūtvā́ prajā́ váruṇena_agrāhayat /
tā́ḥ prajā́ váruṇagṛhītāḥ /
prajā́patiṃ púnar úpādhāvan nāthám icchámānāḥ /
sá etā́n prajā́patir varuṇapraghāsā́n apaśyat /
tā́n níravapat /
táir vái sá prajā́ varuṇapāśā́d amuñcat /
yád varuṇapraghāsā́ nirupyánte //

1.6.4.2

prajā́nām ávaruṇagrāhāya /
tā́sāṃ dákṣiṇo bāhúr nyàkna ā́sīt /
savyáḥ prásṛtaḥ /
sá etā́ṃ dvitī́yāṃ dakṣiṇató védim údahan /
táto vái sá prajā́nāṃ dákṣiṇaṃ bāhúṃ prā́sārayat /
yád dvitī́yāṃ dakṣiṇató védim uddhánti /
tásmāc cāturmāsyayājy àmúṣmim̐l loká ubhayā́bāhuḥ /
yajña_ábhijitam̐ hy àsyá /
pṛthamātrā́d védī ásaṃbhinne bhavataḥ //

1.6.4.3

tásmāt pṛthamātraṃ vyám̐sau /
úttarasyāṃ védyām uttaravedím úpavapati /
paśávo vā́ uttaravedíḥ /
paśū́n evá_avarundhe /
átho yajñaparúṣó 'nantarityai /
etád brāhmaṇāny evá páñca havī́m̐ṣi /
áthaiṣá aindrāgnó bhavati /
prāṇāpānáu vā́ etáu devā́nām /
yád indrāgnī́ /
yád aindrāgnó bhávati //

1.6.4.4

prāṇāpānā́v evá_avarundhe /
ójo bálaṃ vā́ etáu devā́nām /
yád indrāgnī́ /
yád aindrāgnó bhávati /
ójo bálam evá_avarundhe /
māruty ā̀míkṣā bhavati /
vāruṇy ā̀míkṣā /
meṣī́ ca meṣáś ca bhavataḥ /
mithunā́ evá prajā́ varuṇapāśā́n muñcati /
lomaśáu bhavato medhyatvā́ya //

1.6.4.5

śamīparṇā́ny úpavapati /
ghāsám evá_ābhyām ápiyacchati /
prajā́patim annā́dyaṃ ná_upānamat /
sá eténa śata_ídhmena havíṣā_annā́dyam ávārundha /
yát paraḥśatā́ni śamīparṇā́ni bhávanti /
annā́dyasya_ávaruddhyai /
saumyā́ni vái karī́rāṇi /
saumyā́ khálu vā́ ā́hutir divó vṛ́ṣṭiṃ cyāvayati /
yát karī́rāṇi bhávanti /
saumyáyā_evá_ā́hutyā divó vṛ́ṣṭim ávarundhe /
kāyá ékakapālo bhavati /
prajā́naṃ kantvā́ya /
pratipūruṣáṃ karambhapātrā́ṇi bhavanti /
jātā́ evá prajā́ varuṇapāśā́n muñcati /
ékam átiriktam /
janiṣyámāṇā evá prajā́ varuṇapāśā́n muñcati //

Commentaries (4)

Linked texts (5)