Taittiriyabrahmana 1.6.5
Taittirīyabrāhmaṇa 1.6.5
- Language
- Sanskrit
1.6.5.1
úttarasyāṃ védyām anyā́ni havī́m̐ṣi sādayati /
dákṣiṇāyāṃ mārutī́m /
apadhurám eváināṃ yunakti /
átho ója evā́sām ávaharati /
tásmād bráhmaṇaś ca kṣattrā́c ca víśo 'nyato 'pakramíṇīḥ /
mārutyā́ pū́rvayā prácarati /
ánṛtam evā́_avayajate /
vāruṇyā_úttarayā /
antatá evá váruṇam ávayajate /
yád evá_adhvaryúḥ karóti //
1.6.5.2
tát pratiprasthātā́ karoti /
tásmād yát_ śréyān karóti /
tát pā́pīyān karoti /
pátnīṃ vācayati /
médhyām eváināṃ karoti /
átho tápa eváinām úpanayati /
yát_ jārám̐ sántaṃ ná prabrūyāt /
priyáṃ jñātím̐ rundhyāt /
asáu me jārá íti nírdiśet /
nirdíśya_eváinaṃ varuṇapāśéna grāhayati //
1.6.5.3
praghāsyā́n havāmaha íti pátnīm udā́nayati /
áhūtā_eváinām /
yát pátnī puronuvākyā̀m anubrūyā́t /
nírvīryo yájamānaḥ syāt /
yájamāno 'nvāha /
ātmánn evá vīryàṃ dhatte /
ubháu yājyā̀m̐ savīryatvā́ya /
yád grā́me yád áraṇya íty āha /
yathā_uditám evá váruṇam ávayajate /
yajamānadevatyò vā́ āhavanī́yaḥ //
1.6.5.4
bhrātṛvyadevatyò dákṣiṇaḥ /
yád āhavanī́ye juhuyā́t /
yájamānaṃ varuṇapāśéna grāhayet /
dákṣiṇe 'gnau juhoti /
bhrā́tṛvyam evá varuṇapāśéna grāhayati /
śū́rpeṇa juhoti /
ányam evá váruṇam ávayajate /
śīrṣánn adhinidhā́ya juhoti /
śīrṣatá evá váruṇam ávayajate /
pratyáṅ tiṣṭhan_juhoti //
catuṣkoṇagatā kaṇḍikā_iyaṃ pradapātabhrameṇa daṇḍapātabhrameṇa vā_aṣṭapadā jātā
1.6.5.5
pratyáṅṅ evá varuṇapāśā́n nirmucyate /
ákran kárma karmakṛ́ta íty āha /
devā́n ṛṇáṃ niravadā́ya /
anṛṇā gṛhā́n úpapréta_íti vā́va_étád āha /
váruṇagṛhītaṃ vā́ etád yajñásya /
yád yájuṣā gṛhītásya_atirícyate /
túṣāś ca niṣkāsáś ca /
túṣaiś ca niṣkāséna ca_avabhṛthám ávaiti /
váruṇagṛhītena_evá váruṇam ávayajate /
apò 'vabhṛthám ávaiti //
1.6.5.6
apsú vái váruṇaḥ /
sākṣā́d evá váruṇam ávayajate /
prátiyuto váruṇasya pā́śa íty āha /
varuṇapāśā́d evá nírmucyate /
ápratīkṣam ā́yanti /
váruṇasya_antárhityai /
édho 'sya_idhiṣīmáhi_íty āha /
samídhā_evá_agníṃ namasyánta upā́yanti /
téjo 'si téjo máyi dhehi_íty āha /
téja evá_ātmán dhatte //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- The Inner Conflict of Tradition: Essays in Indian Ritual, Kingship, and Society — J. C. Heesterman, English
- Vedic Index of Names and Subjects — Arthur A. Macdonell & A. Berriedale Keith, English
- A Vedic Concordance — Maurice Bloomfield, English
- History of Dharmaśāstra (Ancient and Mediaeval Religious and Civil Law in India) — P. V. Kane, English
- The Religion and Philosophy of the Veda and Upanishads — Arthur Berriedale Keith, English