Taittiriyabrahmana 29.4

29.4

⁹karambhapātrāṇīti || dadhisammiśrāssaktavaḥ karambhāḥ tanmayāni pātrāṇi || gatamanyat || iti ṣaṣṭhe caturtho'nuvākaḥ.
¹uttarasyāmityādi || anyāni mārutyā āmikṣāyāḥ | tāṃ dakṣiṇāyāṃ sādayati | apadhuramiti | dhuro yaddhāmasthānaṃ apadhuraṃ tat bahiṣṭhamiti yāvat | tatra enā viśaḥ apakramaṇaśīlāḥ pṛthaksvabhāvāḥ mārutyāḥ pṛthaksāditatvāt | yadvā--anyatopākramaṇaṃ satyamuktvā anyatrāsatye apasarpaṇam || ²mārutyā pūrvayā prathamayā pracaritavyam | tena anṛtaṃ viśassvabhāvaṃ anyato'pakramaṇaśīlatvaṃ avayajate nāśayati | vāruṇyottarayā
pracaritavyam | antato varuṇaṃ vārakaṃ varuṇapāśaṃ vā avayajate anṛtāvayajanādanantaram | yadvā—antataḥ yāvadantaṃ kṛtsnaṃ varuṇamityarthaḥ ||
³yaddevetyādi || yat yajjātīyaṃ pratiprasthātā karoti | śreyān praśasyataraḥ | pāpīyān alpataraḥ | patnīṃ vācayati “ praghāsyān ”¹ iti | medhārhāṃ enāṃ vācanena karoti atho api ca anena vācanena enāṃ tapa evopanayati ||
⁴yajjāramityādi || atra pratiprasthātā pṛcchati patnīṃ kati te jārā iti tatra yadi jāraṃ vidyamānaṃ na prabrūyāt priyaṃ jñātiṃ bhartāraṃ putraṃ vā rundhayāt varuṇapāśena grāhayet | tasmāt asau me jāra iti nāmnā jāraṃ nirdiśet | enaṃ nirdiśya nirdeśaṃ jārasya kurvatī enaṃ jāraṃ eva varuṇapāśena grāhayati na tu priyaṃ jñātim ||