Taittiriyabrahmana 1.6.8
Taittirīyabrāhmaṇa 1.6.8
- Language
- Sanskrit
1.6.8.1
vaiśvadevéna vái prajā́patiḥ prajā́ asṛjata /
tā́ varuṇapraghāsáir varuṇapāśā́d amuñcat /
sākamedháiḥ prátyasthāpayat /
tryàmbakai rudráṃ nirávādayata /
pitṛyajñéna suvargáṃ lokám agamayat /
yád vaiśvadevéna yájate /
prajā́ evá tád yájamānaḥ sṛjate /
tā́ varuṇapraghāsáir varuṇapāśā́n muñcati /
sākamedháiḥ prátiṣṭhāpayati /
tryàmbakai rudráṃ nírávadayate //
1.6.8.2
pitṛyajñéna suvargáṃ lokáṃ gamayati /
dakṣiṇatáḥ prācīnāvītī́ nírvapati /
dakṣiṇā́vṛd dhí pitṛṇā́m /
ánādṛtya tát /
uttaratá evá_upavī́ya nírvapet /
ubháye hí devā́ś ca pitáraś ca_ijyánte /
átho yád evá dakṣiṇārdhè 'dhiśráyati /
téna dakṣiṇā́vṛt /
sómāya pitṛmáte puroḍā́śam̐ ṣáṭkapālaṃ nírvapati /
saṃvatsaró vái sómaḥ pitṛmā́n //
1.6.8.3
saṃvatsarám evá prīṇāti /
pitṛ́bhyo barhiṣádbhyo dhānā́ḥ /
mā́sā vái pitáro barhiṣádaḥ /
mā́sān evá prīṇāti /
yásmin vā́ ṛtáu púruṣaḥ pramī́yate /
sò 'sya_amúṣmim̐l loké bhavati /
bahurūpā́ dhānā́ bhavanti /
ahorātrā́ṇām abhíjityai /
pitṛ́bhyo 'gniṣvāttébhyo manthám /
ardhamāsā́ vái pitáro 'gniṣvātā́ḥ //
1.6.8.4
ardhamāsā́n evá prīṇāti /
abhivānyā̀yai dugdhé bhavati /
sā́ hí pitṛdevatyàṃ duhé /
yát pūrṇám /
tán manuṣyā̀ṇām /
uparyardhó devā́nām /
ardháḥ pitṛṇām /
ardhá úpamanthati /
ardhó hí pitṛṇām /
ékayā_úpamanthati //
1.6.8.5
ékā hí pitṛṇām /
dakṣiṇā_úpamanthati /
dakṣiṇā́vṛd dhí pitṛṇā́m /
ánārabhya_úpamanthati /
tád dhí pitṛ́̄n gácchati /
imā́ṃ díśaṃ védim úddhanti /
umáye hí devā́ś ca pitáraś ca_ijyánte /
cátuḥsraktir bhavati /
sárvā hy ánu díśaḥ pitáraḥ /
ákhātā bhavati //
1.6.8.6
khātā́ hí devā́nām /
madhyatò 'gnír ā́dhīyate /
antató hí devā́nām ādhīyáte /
várṣīyān idhmá idhmā́d bhavati vyā́vṛttyai /
páriśrayati /
antárhito hí pitṛlokó manuṣyalokā́t /
yát páruṣi dinám /
tád devā́nām /
yád antarā́ /
tán manuṣyā̀ṇām //
1.6.8.7
yát sámūlam /
tát pitṛṇā́m /
sámūlaṃ barhír bhavati vyā́vṛttyai /
dakṣiṇā́ stṛṇāti /
dakṣiṇā́vṛd dhí pitṛṇā́m /
tríḥ páryeti /
tṛtī́ye vā́ itó loké pitáraḥ /
tā́n evá prīṇāti /
tríḥ púnaḥ páryeti /
ṣáṭ sáṃpadyante //
1.6.8.8
ṣáḍ vā́ ṛtávaḥ /
ṛtū́n evá prīṇāti /
yát prastaráṃ yájuṣā gṛhṇīyā́t /
pramā́yuko yájamānaḥ syāt /
yán ná gṛhṇīyā́t /
anāyatanáḥ syāt /
tūṣṇī́m evá nyasyet /
ná pramā́yuko bhávati /
ná_anāyatanáḥ /
yát trī́n paridhī́n paridadhyā́t //
1.6.8.9
mṛtyúnā yájamānaṃ párigṛhṇīyāt /
yán ná paridadhyā́t /
rákṣām̐si yajñám̐ hanyuḥ /
dváu paridhī́ páridadhāti /
rákṣasām ápahatyai /
átho mṛtyór evá yájamānam útsṛjati /
yát trī́ṇi_trīṇi havī́m̐ṣy udāháreyuḥ /
tráyas_traya eṣā́m̐ sākáṃ prámīyeran /
ékaikam anūcī́nāny udā́haranti /
ékaika eváiṣām anváñcaḥ prámīyate /
kaśípu kaśipavyā̀ya /
upabárhaṇam upabarhaṇyā̀ya /
ā́ñjanam āñjanyā̀ya /
abhyáñjanam abhyañjanyā̀ya /
yathābhāgám eváinān prīṇāti //