Taittiriyabrahmana 2.2.4
Taittirīyabrāhmaṇa 2.2.4
- Language
- Sanskrit
2.2.4.1
prajā́patir akāmayata prájāyeya_íti /
sá etáṃ dáśahotāram apaśyat /
téna daśadhā́_ātmā́naṃ vidhā́ya /
dáśahotrā_atapyata /
tásya cíttiḥ srúg ā́sīt /
cittám ā́jyam /
tásya_etā̀vaty evá vā́g ā́sīt /
etā́vān yajñakratúḥ //
sá cáturhotāram asṛjata /
sò 'nandat //
2.2.4.2
ásṛkṣi vā́ imám íti /
tásya sómo havír ā́sit /
sá cáturhotrā_atapyata /
sò 'tāmyat /
sá bhū́r íti vyā́harat /
sá bhū́mim asṛjata /
agnihotráṃ darśāpūrṇamāsáu yájūm̐ṣi /
sá dvitī́yam atapyata /
sò 'tāmyat /
sá bhúva íti vyā́harat //
2.2.4.3
sò 'ntárikṣam asṛjata /
cāturmāsyā́ni sā́māni /
sá tṛtī́yam atapyata /
sò 'tāmyat /
sá súvar íti vyā́harat /
sá dívam asṛjata /
agniṣṭomám ukthyàm atirātrám ṛ́caḥ /
etā́ vái vyā́hṛtaya imé lokā́ḥ /
imā́n khálu vái lokā́n ánu prajā́ḥ paśávaś chándām̐si prā́jāyanta /
yá evám etā́ḥ prajā́pateḥ prathamā́ vyā́hṛtīḥ prájātā véda //
2.2.4.4
prá prajáyā paśúbhir mithunáir jāyate //
sá páñcahotāram asṛjata /
sá havir ná_avindata /
tásmai sómas tanúvaṃ prā́yacchat /
etát te havír íti /
sá páñcahotrā_atapyata /
sò 'tāmyat /
sá pratyáṅṅ abādhata /
sò 'surān asṛjata /
tád asya_ápriyam āsīt //
2.2.4.5
tád durvárṇam̐ híraṇyam abhavat /
tád durvárṇasya híraṇyasya jánma /
sá dvitī́yam atapyata /
sò 'tāmyat /
sá prā́ṅ abādhata /
sá devā́n asṛjata /
tád asya priyám asīt /
tát suvárṇam̐ híraṇyam abhavat /
tát suvárṇasya híraṇyasya jánma /
yá evám̐ suvárṇasya híraṇyasya jánma véda //
2.2.4.6
suvárṇa ātmánā bhavati /
durvárṇo 'sya bhrā́tṛvyaḥ /
tásmāt suvárṇam̐ híraṇyaṃ bhāryàm /
suvárṇa evá bhavati /
ā́_énaṃ priyáṃ gacchati ná_ápriyam //
sá saptáhotāram asṛjata /
sá saptáhotrā_evá suvargáṃ lokám ait //
triṇavéna stómena_ebhyó lokébhyó 'surān prā́ṇudata /
trayastrim̐śéna prátyatiṣṭhat /
ekavim̐śéna rúcam adhatta //
2.2.4.7
saptadaśéna prā́jāyata /
yá eváṃ vidvā́nt sómena yájate /
saptáhotrā_evá suvargáṃ lokám eti /
triṇavéna stomena_ebhyó lokébhyo bhrā́tṛvyān práṇudate /
trayastrim̐śéna prátitiṣṭhati /
ekavim̐śéna rúcaṃ dhatte /
saptadaśéna prájāyate /
tásmāt saptadaśáḥ stómo ná nirhṛ́tyaḥ /
prajā́patir vái saptadaśáḥ /
prajā́patim evá madhyató dhatte prájātyai //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (6)
- Yajurbrāhmaṇa — Sanskrit
- History of Dharmaśāstra (Ancient and Mediaeval Religious and Civil Law in India) — P. V. Kane, English
- Original Sanskrit Texts on the Origin and History of the People of India, their Religion and Institutions — John Muir, English
- Minerals and Metals in Ancient India — Arun Kumar Biswas & Sulekha Biswas, English
- Mahānyāsaprayoga — Sanskrit
- The Arctic Home in the Vedas — Bal Gangadhar Tilak, English