Pramāṇa · Search · About · API

Taittiriyabrahmana 2.4.5

Taittirīyabrāhmaṇa 2.4.5

Language
Sanskrit

2.4.5.1

vṛ́ṣā só am̐śúḥ pavate havíṣmānt sómaḥ /
índrasya bhāgá ṛtayúḥ śata_ā́yuḥ /
sá mā vṛ́ṣāṇaṃ vṛṣabháṃ kṛṇotu /
priyáṃ viśā́m̐ sárvavīram̐ suvī́ram //
kásya vṛ́ṣā saté sácā /
niyútvān vṛṣabhó raṇat /
vṛtrahā́ sómapītaye //
yás te śṛṅga vṛṣo napāt /
práṇapāt kuṇḍapā́yyaḥ /
ny àsmin dadhra ā́ manaḥ //

2.4.5.2

tám̐ sadhrī́cīr ūtáyo vṛ́ṣṇiyāni /
páum̐syāni niyútaḥ saścur índram /
samudráṃ ná síndhava uktháśuṣmāḥ /
uruvyácasaṃ gíra ā́viśanti //
índrāya gíro ániśitasargāḥ /
apáḥ práirayant ságarasya budhnā́t /
yó ákṣeṇa_iva cakríyā śácibhiḥ /
víṣvaktastámbha pṛthivī́m utá dyā́m //
ákṣodayat_śávasā kṣā́ma budhnám /
vā́rṇávātas táviṣībhir índraḥ //

2.4.5.3

dṛḍhā́ny aughnād uśámāna ójaḥ /
ávābhinat kakúbhaḥ párvatānām //
ā́ no agne suketúnā /
rayíṃ viśvā́yupoṣasam /
mārḍīkáṃ dhehi jīváse //
tvám̐ soma mahé bhágam /
tváṃ yū́na ṛtāyaté /
dákṣaṃ dadhāsi jīváse //
ráthaṃ yuñjate marútaḥ śubhé sugám sū́ro ná mitrāvaruṇā gáviṣṭiṣu //

2.4.5.4

rájām̐si citrā́ vícaranti tanyávaḥ /
diváḥ samrājā páyasā na ukṣatam //
vā́cam̐ sú mitrāvaruṇāv írāvatīm /
parjányaś citrā́ṃ vadati tvíṣīmatīm /
abhrā́ vasata marutaḥ su māyáyā /
dyā́ṃ varṣayatam aruṇā́m arepásam //
áyukta saptá śundhyúvaḥ /
sū́ro ráthasya naptríyaḥ /
tā́bhir yāti sváyuktibhiḥ //
váhiṣṭhebhir viháran yā́si tántum //

2.4.5.5

avavyáyann ásitaṃ deva vásvaḥ /
dávidhvato raśmáyaḥ sū́ryasya /
cárma_iva_ávādhus támo apsv àntaḥ //
parjányāya prágāyata /
divás putrā́ya mīḍhúṣe /
sá no yavásam icchatu //
ácchā vada tavásaṃ gīrbhír ābhíḥ /
stuhí parjányaṃ námasā́ vivāsa /
kánikradad vṛṣabhó jīrádānuḥ /
réto dadhātv óṣadhīṣu gárbham //

2.4.5.6

yó gárbham óṣadhīnām /
gávāṃ kṛṇóty árvatām /
parjányaḥ puruṣī́ṇām //
tásmā ídāsyè havíḥ /
juhótā mádhumattamam /
íḍāṃ naḥ saṃyátaṃ karat //
tisró yád agne śarádas tvā́m ít /
śúciṃ ghṛténa śúcayaḥ saparyán /
nā́māni cid dadhire yajñíyāni /
ásūdayanta tanúvaḥ sújātāḥ //

2.4.5.7

índraś ca naḥ śunāsīrau /
imáṃ yajñáṃ mimikṣatam /
gárbhaṃ dhattám̐ svastáye //
yáyor idáṃ víśvaṃ bhúvanam āvivéśa /
yáyor ānandó níhito máhaś ca /
śúnāsīrāv ṛtúbhiḥ saṃvidānáu /
índravantau havír idáṃ juṣethām //
ā́ ghā yé agním indhaté /
stṛṇánti barhír ānuṣak /
yéṣām índro yúvā sákhā //
ágne índraś ca medínā /
hathó vṛtrā́ṇy apratí /
yuvám̐ hí vṛtrahántamā //
yā́bhyām̐ súvar ájayann ágra evá /
yā́v ātasthatúr bhúvanasya mádhye /
prácarṣaṇī́ vṛṣaṇā vájrabāhū /
agnī́ índrā vṛtraháṇā huve vām //

Commentaries (1)

Linked texts (4)