Pramāṇa · Search · About · API

Taittiriyabrahmana 2.4.6

Taittirīyabrāhmaṇa 2.4.6

Language
Sanskrit

2.4.6.1

utá naḥ priyā́ priyā́su /
saptásvasā sújuṣṭā /
sárasvatī stómyā_abhūt //
imā́ júhvānā yuṣmád ā́ námobhiḥ /
práti stómam̐ sarasvati juṣasva /
táva śárman priyátame dádhānāḥ /
úpastheyāma śaraṇáṃ ná vṛkṣám //
trī́ṇi padā́ vícakrame /
víṣṇur gopā́ ádābhyaḥ /
táto dhármāṇi dhāráyan //

2.4.6.2

tád asya priyám abhí pā́tho aśyām /
náro yátra devayávo mádanti /
urukramásya sá hí bándhur itthā́ /
víṣṇoḥ padé paramé mádhva útsaḥ //
kratvā dā́ asthu śréṣṭhaḥ /
adyá tvā vanvánt surékṇāḥ /
márta ānāśa suvṛktím //
imā́ brahma brahmavāha /
priyā́ ta ā́ barhíḥ sīda /
vīhí sūra puroḍā́śam //

2.4.6.3

úpa naḥ sūnávo gíraḥ /
śṛṇván tvam ṛ́tasya yé /
sumṛḍīkā́ bhavantu naḥ //
adyā́ no deva savitaḥ /
prajā́vat sāvīḥ sáubhagam /
párā duṣṣvápniyam̐ suva //
víśvāni deva savitaḥ /
duritā́ni párāsuva /
yád bhadráṃ tán ma ā́suva //
śúcim arkáir bṛ́haspátim //

2.4.6.4

adhvaréṣu namasyata /
anāmy ója ā́cake //
yā́_adhāráyanta devā́ sudákṣā dákṣapitārā /
asuryā̀ya prámahasā //
sá ít kṣéti súdhita ókasi své /
tásmā íḍā pinvate viśvadā́nī /
tásmai víśaḥ svayám evá_ānamanti /
yásmin brahmā́ rā́jani pū́rva éti //
sákūtim indra sácyutim /
sácyutiṃ jaghánacyutim //

2.4.6.5

kanā́t kābhā́ṃ na ā́bhara /
prayapsyánn iva sakthyàu //
ví na indra mṛ́dho jahi /
kánīkhunad iva sāpáyan /
abhí naḥ súṣṭutiṃ naya //
prajā́patiḥ striyā́ṃ yáśaḥ /
muṣkáyor adadhāt sápam /
kā́masya tṛ́ptim ānandám /
tásya_agne bhājaya_ihá mā //
módaḥ pramodá ānandáḥ //

2.4.6.6

muṣkáyor níhitaḥ sápaḥ /
sṛtvā́_iva kā́masya tṛpyāṇi /
dákṣiṇānāṃ pratigrahé //
mánasaś cit tám ā́kūtim /
vācáḥ satyám aśīmahi /
paśūnā́m̐ rūpám ánnasya /
yáśaḥ śrī́ḥ śrayatāṃ máyi //
yáthā_ahám asyā́ átṛpam̐ striyái púmān /
yáthā strī́ tṛ́pyati pum̐sí priyé priyā́ /
eváṃ bhágasya tṛ́pyāṇi //

2.4.6.7

yajñásya kā́myaḥ priyáḥ //
dádāmi_íty agnír vadati /
táthā_íti vāyúr āha tát /
hánta_íti satyáṃ candrámāḥ /
ādityáḥ satyám óm íti //
ā́pas tát satyám ā́bharan /
yáśo yajñásya dákṣiṇām /
asáu me kā́maḥ sámṛdhyatām //
ná hí spáśam ávidann anyám asmā́t /
vaiśvānarā́t puraetā́ram agnéḥ //

2.4.6.8

átha_im amanthann amṛ́tam ámūrāḥ /
vaiśvānaráṃ kṣetrajítyāya devā́ḥ //
yéṣām imé pū́rve ármāsa ā́san /
ayūpā́ḥ sádma víbhṛtā purū́ṇi /
váiśvānara tváyā té nuttā́ḥ /
pṛthivī́m anyā́m abhítasthur jánāsaḥ //
pṛthivī́ṃ mātáraṃ mahī́m /
antárikṣam úpabruve /
bṛhatī́m ūtáye dívam //
víśvaṃ bibharti pṛthivī́ //

2.4.6.9

antárikṣaṃ vípaprathe /
duhé dyáur bṛhatī́ páyaḥ //
ná tā́ naśanti ná dabhāti táskaraḥ /
ná_enā amitró vyáthir ā́dadharṣati /
devā́m̐ś ca yā́bhir yájate dádāti ca /
jyóg it tā́bhiḥ sacate gópatiḥ sahá //
ná tā́ árvā reṇúkakāṭo aśnute /
ná sam̐skṛtatrám úpayanti tā́ abhí /
urugāyám ábhayaṃ tásya tā́ ánu /
gā́vo mártyasya vícaranti yájvanaḥ //

2.4.6.10

rā́trī vyàkhyad āyatī́ /
purutrā́ devy àkṣábhiḥ /
víśvā ádhi śríyo 'dhita //
úpa te gā́ iva_ákaram /
vṛṇīṣvá duhitar divaḥ /
rā́trī stómaṃ ná jigyúṣī //
devī́ṃ vā́cam ajanayanta devā́ḥ /
tā́ṃ viśvárūpāḥ paśávo vadanti /
sā́ no mandréṣam ū́rjaṃ dúhānā dhenúr vā́g asmā́n úpa súṣṭutā_étu //

2.4.6.11

yád vā́g vádanty avicetanā́ni /
rā́ṣṭrī devā́nāṃ niṣasā́da mandrā́ /
cátasra ū́rjaṃ duduhe páyām̐si /
kvà svid asyāḥ paramáṃ jagāma //
gaurī́ mimāya salilā́ni tákṣatī /
ékapadī dvipádī sā́ cátuṣpadī /
aṣṭā́padī návapadī babhūvúṣī /
sahásra_akṣarā paramé vyòman //
tásyām̐ samudrā́ ádhi víkṣaranti /
téna jīvanti pradíśaś cátasraḥ //

2.4.6.12

tátaḥ kṣaraty akṣáram /
tád víśvam úpajīvati //
índrā sū́rā janáyan viśvákarmā /
marútvām̐ astu gaṇávānt sajātávān /
asyá snuṣā́ śváśurasya práśiṣṭim /
sapátnā vā́caṃ mánasā úpāsatām //
índraḥ sū́ro atarad rájām̐si /
snuṣā́ sapátnaḥ śváśuro 'yám astu /
ayám̐ śátrūñ jayatu járhṛṣāṇaḥ /
ayáṃ vā́jaṃ jayatu vā́jasātau //
agníḥ kṣatrabhṛ́d ánibhṛṣṭam ójaḥ /
sahasríyo dīpyatām áprayucchan /
vibhrā́jamānaḥ samidhāná ugráḥ /
ā́_antárikṣam aruhad ágan dyā́m //

Commentaries (1)

Linked texts (2)