Taittiriyabrahmana 2.4.7
Taittirīyabrāhmaṇa 2.4.7
- Language
- Sanskrit
2.4.7.1
vṛ́ṣā_asy am̐śúr vṛṣabhā́ya gṛhyase /
vṛ́ṣā_ayám ugró nṛcákṣase /
divyáḥ karmaṇyò hitó bṛhán nā́ma /
vṛṣabhásya yā́ kakút //
viṣūvā́n viṣṇo bhavatu /
ayáṃ yó māmakó vṛ́ṣā /
átho índra iva devébhyaḥ /
víbravītu jánebhyaḥ //
ā́yuṣmantaṃ várcasvantam /
átho ádhipatiṃ viśā́m //
2.4.7.2
asyā́ḥ pṛthivyā́ ádhyakṣam /
imám indra vṛṣabháṃ kṛṇu /
yáḥ suśṛ́ṅgaḥ suvṛṣabháḥ /
kalyā́ṇo dróṇa ā́hitaḥ /
kā́rṣīvalapragāṇena /
vṛṣabhéṇa yajāmahe //
vṛṣabhéṇa yájamānāḥ /
ákrūreṇa_iva sarpíṣā /
mṛ́dhaś ca sárvā índreṇa /
pṛ́tanāś ca jayāmasi //
2.4.7.3
yásya_ayám ṛṣabhó havíḥ /
índrāya pariṇīyáte /
jáyāti śátrum āyántam /
átho hanti pṛtanyatáḥ //
nṛṇā́m áha praṇī́r ásat /
ágra udbhindatā́m asat //
índra śúṣmaṃ tanúvā mérayasva /
nīcā́ víśvā abhítiṣṭha_abhímātīḥ /
níśṛṇīhy ābādháṃ yó no ásti /
urúṃ no lokáṃ kṛṇuhi jīradāno //
2.4.7.4
préhy abhípréhi prábharā sáhasva /
mā́ víveno víśṛṇuṣvā jáneṣu /
úd īḍitó vṛṣabha tíṣṭha śúṣmaiḥ /
índra śátrūn puró asmā́ka yudhya //
ágne jétā tváṃ jaya /
śátrūnt sahasa ójasā /
ví śátrūn vímṛ́dho nuda //
etáṃ te stómaṃ tuvijāta vípraḥ /
ráthaṃ ná dhīraḥ svápā atakṣam /
yád ī́d agne práti tváṃ deva háryāḥ //
2.4.7.5
súvarvatīr apá enā jayema //
yó ghṛténa_abhímānitaḥ /
índra jáitrāya jajñiṣe /
sá naḥ sáṃkāsu pāraya /
pṛtanāsā́hyeṣu ca //
índro jigāya pṛthivī́m /
antárikṣam̐ súvar mahát /
vṛtrahā́ purucétanaḥ //
índro jigāya sáhasā sáhām̐si /
índro jigāya pṛ́tanāni víśvā //
2.4.7.6
índro jātó ví púro ruroja /
sá naḥ paraspā́ várivaḥ kṛṇotu //
ayáṃ kṛtnúr ágṛbhītaḥ /
viśvajíd udbhíd ít sómaḥ /
ṛ́ṣir vípraḥ kā́vyena //
vāyúr agregā́ yajñaprī́ḥ /
sākáṃ gan mánasā yajñám /
śivó niyúdbhiḥ śivā́bhiḥ //
vā́yo śukró ayāmi te /
mádhvo ágraṃ díviṣṭiṣu //
2.4.7.7
ā́yāhi sómapītaye /
svāruhó deva niyútvatā //
imám indra vardhaya kṣatríyāṇām /
ayáṃ viśā́ṃ viśpátir astu rā́jā /
asmā́ indra máhi várcām̐si dhehi /
avarcásaṃ kṛṇuhi śátrum asya //
imám ā́bhaja grā́me áśveṣu góṣu /
nír amúṃ bhaja yò 'mítro asya /
várṣman kṣatrásya kakúbhi śrayasva /
táto na ugró víbhajā vásūni //
2.4.7.8
asmé dyāvāpṛthivī bhū́ri vāmám /
sáṃduhāthāṃ gharmadúghā_iva dhenúḥ /
ayám̐ rā́jā priyá índrasya bhūyāt /
priyó gávām óṣadhīnām utá_apā́m //
yunájmi ta uttarā́vantam índram /
yéna jáyāsi ná párājáyāsai /
sá tvā_akar ekavṛṣabhám̐ svā́nām /
átho rājann uttamáṃ mānavā́nām //
úttaras tvám ádhare te sapátnāḥ /
ékavṛṣā índrasakhā jigīvā́n //
2.4.7.9
víśvā ā́śāḥ pṛ́tanāḥ saṃjáyaṃ jáyan /
abhítiṣṭha śatrūyatáḥ sahasva //
túbhyaṃ bharanti kṣitáyo yaviṣṭha /
balím agne ánti ta ótá dūrā́t /
ā́ bhándiṣṭhasya sumatíṃ cikiddhi /
bṛhát te agne máhi śárma bhadrám //
yó dehyó ánamayad vadhasnáiḥ /
yó áryapatnīr uṣásaś cakā́ra /
sá nirúdhyā náhuṣo yahvó agníḥ /
víśaś cakre balihṛ́taḥ sáhobhiḥ //
2.4.7.10
prá sadyó agne átyeṣy anyā́n /
āvír yásmai cā́rutaro babhū́tha /
īḍé 'nyo vapuṣyò vibhā́vā /
priyó viśā́m átithir mā́nuṣīṇām //
bráhma jyeṣṭhā vīryā̀ sáṃbhṛtāni /
bráhma_ágre jyéṣṭhaṃ dívam ā́tatāna /
ṛtásya bráhma prathamā́_utá jajñe /
téna_arhati bráhmaṇā spárdhituṃ káḥ //
bráhma srúco ghṛtávatīḥ /
bráhmaṇā sváravo mitā́ḥ //
2.4.7.11
bráhma yajñásya tántavaḥ /
ṛtvíjo yé haviṣkṛ́taḥ //
śṛ́ṅgāṇi_iva_ít_śṛṅgíṇām̐ sáṃdadṛśrire /
caṣā́lavantaḥ sváravaḥ pṛthivyā́m /
té devā́saḥ sváravas tasthivā́m̐saḥ /
námaḥ sákhibhyaḥ sannā́n mā́_avagāta /
abhibhū́r agnír atarad rájā́m̐si /
spṛ́dho vihátya pṛ́tanā abhiśrī́ḥ /
juṣāṇó ma ā́hutiṃ mā mahiṣṭa /
hatvā́ sapátnān várivaskaraṃ naḥ /
ī́śānaṃ tvā bhúvanānām abhiśríyam /
stáumy agna urukṛ́tam̐ suvī́ram /
havír juṣāṇáḥ sapátnām̐ abhibhū́r asi /
jahí śátrūm̐r ápa mṛ́dho nudasva //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit