Pramāṇa · Search · About · API

Taittiriyabrahmana 2.5.5

Taittirīyabrāhmaṇa 2.5.5

Language
Sanskrit

2.5.5.1

yajñó rāyó yajñá īśe vásūnām /
yajñáḥ sasyā́nām utá sukṣitīnā́m /
yajñá iṣṭáḥ pūrvácittiṃ dadhātu /
yajñó brahmaṇvā́m̐ ápyetu devā́n //
ayáṃ yajñó vardhatāṃ góbhir áśvaiḥ /
iyáṃ védiḥ svapatyā́ suvī́rā /
idáṃ barhír áti barhī́m̐ṣy anyā́ /
imáṃ yajñáṃ víśve avantu devā́ḥ //
bhága evá bhágavām̐ astu devāḥ /
téna vayáṃ bhágavantaḥ syāma //

2.5.5.2

táṃ tvā bhaga sárva ít _ johavīmi /
sá no bhaga puraetā́ bhava_ihá /
bhága práṇetar bhága sátyarādhaḥ /
bhága_imā́ṃ dhíyam úd avadádan naḥ /
bhága prá ṇo janaya góbhir áśvaiḥ /
bhága prá nṛ́bhir nṛvántaḥ syāma //
śáśvatīḥ sámā úpayanti lokā́ḥ /
śáśvatīḥ sámā úpayanty ā́paḥ /
iṣṭáṃ pūrtám̐ śáśvatīnām̐ sámānām̐ śāśvaténa /
havíṣā_iṣṭvā́_anantáṃ lokáṃ páram ā́ruroha //

2.5.5.3

iyám evá sā́ yā́ prathamā́ vyáucchat /
sā́ rūpā́ṇi kurute páñca devī́ //
dvé svásārau vayatas tántram etát /
sanātánaṃ vítatam̐ ṣáṇmayūkham /
áva_anyā́m̐s tántūn kiráto dhattó anyā́n /
ná_avapṛjyā́te ná gamāte ántam //
ā́ vo yantu_udavāhā́so adyá /
vṛ́ṣṭiṃ yé víśve marúto junánti /
ayáṃ yó agnír marutaḥ sámiddhaḥ /
etáṃ juṣadhvaṃ kavayo yuvānaḥ //

2.5.5.4

dhārāvarā́ marúto dhṛṣṇú v ojasaḥ /
mṛgā́ ná bhīmā́s taviṣébhir ūrmíbhiḥ /
agnáyo ná śuśucānā́ ṛjīṣíṇaḥ /
bhrúmiṃ dhámanta úpa gā́ avṛṇvata //
vícakrame trír deváḥ /
ā́vedhásaṃ nī́lapṛṣṭhaṃ bṛhántam /
bṛ́haspátim̐ sádane sādayadhvam /
sādádyoniṃ dáma ā́dīdivā́m̐sam /
híraṇyavarṇam aruṣám̐ sapema //
sá hí śúciḥ śatápatraḥ sá śundhyū́ḥ //

2.5.5.5

híraṇyavāśīr iṣiráḥ suvarṣā́ḥ /
bṛ́haspátiḥ sá svāveśá ṛṣvā́ḥ /
pūrū́ sákhibhya āsutíṃ kariṣṭhaḥ //
pū́ṣam̐s táva vraté vayám /
ná riṣyema kadā́ caná /
stotā́ras ta ihá smasi //
yā́s te pūṣan nā́vo antáḥ samudré /
hiraṇyáyīr antárikṣe cáranti /
yā́bhir yāsi dūtyā́m̐ sū́ryasya /
kā́mena kṛtáḥ śráva icchámānaḥ //

2.5.5.6

áraṇyāny áraṇyāny asáu /
yā́ prá_iva náśyasi /
kathā́ grā́maṃ ná pṛcchasi /
ná tvā bhī́r iva vindatī3 //
vṛṣāravā́ya vádate /
yád upā́vati ciccikáḥ /
āghāṭī́bhir iva dhāváyan /
araṇyānír mahīyate //
utá gā́va iva_ādan /
utó véśma_iva dṛśyate //

2.5.5.7

utó araṇyāníḥ sāyám /
śakaṭī́r iva sarjati //
gā́m aṅga_éṣa ā́hvayati /
dā́rv aṅga_éṣa úpāvardhīt /
vásann araṇyānyā́m̐ sāyám /
ákrukṣad íti manyate //
ná vā́ araṇyānír hanti /
anyáś ca_ín ná_abhigácchati /
svādóḥ phálasya jagdhvā́ /
yátra kā́maṃ nípadyate //
ā́ñjanagandhīm̐ surabhī́m /
bahvannā́m ákṛṣīvalām /
prá_aháṃ mṛgā́ṇāṃ mātáram /
araṇyānī́m aśam̐siṣam //

Commentaries (4)

Linked texts (6)