Taittiriyabrahmana 3.2.6
Taittirīyabrāhmaṇa 3.2.6
- Language
- Sanskrit
3.2.6.1
ávadhūtam̐ rákṣó 'vadhūtā árātaya íty āha /
rákṣasām ápahatyai /
ádityās tvág asī́ty āha /
iyáṃ vā́ áditiḥ /
asyā́ evá_enat tvácaṃ karoti /
práti tvā pṛthivī́ vettv íty āha prátiṣṭhityai /
purástāt pratīcī́nagrīvam úttaraloma_úpastṛṇāti medhyatvā́ya /
tásmāt purástāt pratyáñcaḥ paśávo médham úpatiṣṭhante /
tásmāt prajā́ mṛgáṃ grā́hukāḥ /
yajñó devébhyo nílāyata //
3.2.6.2
kṛ́ṣṇo rūpáṃ kṛtvā́ /
yát kṛṣṇājiné havír adhipináṣṭi /
yajñā́d evá tád yajñáṃ práyuṅkte /
havíṣó 'skandāya /
dyā́vāpṛthivī́ saha_ā́stām /
té śamyāmātrám ékam ahar vyáitām̐ śamyāmātrám ékam áhaḥ /
diváḥ skambhanír asi práti tvā_ā́dityās tvág vettv íty āha /
dyā́vāpṛthivyór vī́tyai /
dhiṣáṇāsi parvatyā́ práti tvā diváḥ skambhanír vettv íty āha /
dyā́vāpṛthivyór vídhṛtyai //
3.2.6.3
dhiṣáṇāsi pārvateyī́ práti tvā parvatír vettv íty āha /
dyā́vā́pṛthivyór dhṛ́tyai /
devásya tvā savitúḥ prasavá íty āha prásūtyai /
aśvínor bāhúbhyām íty āha /
aśvínau hí devā́nām adhvaryū́ ā́stām /
pūṣṇó hástābhyām íty āha yátyai /
ádhivapāmī́ty āha /
yathādevatám evá_enān ádhivapati /
dhānyàm asi dhinuhí devā́n íty āha /
etásya yájuṣo vīryèṇa //
3.2.6.4
yā́vad ékā devátā kāmáyate yā́vad ékā /
tā́vad ā́hutiḥ prathate /
ná hí tád ásti /
yát tā́vad evá syā́t /
yā́vaj juhóti /
prāṇā́ya tvā_apānā́ya tvā_íty āha /
prāṇā́n evá yájamāne dadhāti /
dīrghā́m ánu prásitim ā́yuṣe dhām íty āha /
ā́yur evá_asmin dadhāti /
antárikṣād iva vā́ etā́ni práskandanti /
yā́ni dṛṣádaḥ /
devó vaḥ savitā́ híraṇyapāniḥ práti gṛhṇātv íty āha prátiṣṭhityai /
havíṣó 'skandāya /
ásaṃvapantī pim̐ṣā_aṇū́ni kurutād íty āha medhyatvā́ya //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Bhāradvājaśrautasūtra — Sanskrit
- A Vedic Concordance — Maurice Bloomfield, English