Pramāṇa · Search · About · API

Taittiriyabrahmana 3.6.3

Taittirīyabrāhmaṇa 3.6.3

Language
Sanskrit

3.6.3.1

sámiddho adyá mánuṣo duroṇé /
devó devā́n yajasi jātavedaḥ /
ā́ ca váha mitramahaś cikitvā́n /
tváṃ dūtáḥ kavír asi prácetāḥ /
tánūnapāt pathá ṛtásya yā́nān /
mádhvā samañjánt svadayā sujihva /
mánmāni dhībhír utá yajñám ṛndhán /
devatrā́ ca kṛṇuhy adhvaráṃ naḥ /
nárāśam̐sasya mahimā́nameṣām /
úpastoṣāma yajatásya yajñáiḥ //

3.6.3.2

té sukrátavaḥ śúcayo dhiyaṃdhā́ḥ /
svádantu devā́ ubháyāni havyā́ /
ājúhvāna ī́ḍyo vándyaś ca /
ā́yāhy agne vásubhiḥ sajóṣāḥ /
tváṃ devā́nām asi yahva hótā /
sá enān yakṣīṣitó yájīyān /
prācī́naṃ barhíḥ pradíśā pṛthivyā́ḥ /
vástor asyā́ vṛjyate ágre áhnām /
vy ù prathate vitaráṃ várīyaḥ /
devébhyo áditaye syonám //

3.6.3.3

vyácasvatīr urviyā́ víśrayantām /
pátibhyo ná jánayaḥ śúmbhamānāḥ /
dévīr dvāro bṛhatīr viśvaminvāḥ /
devébhyo bhavatha suprāyaṇā́ḥ /
ā́ suṣváyantī yajaté úpāke /
uṣā́sānáktā sadatāṃ ní yónau /
divyé yóṣaṇe bṛhatī́ surukmé /
ádhi śríyam̐ śukrapíśaṃ dádhāne /
dáivyā hótārā prathamā́ suvā́cā /
mímānā yajñáṃ mánuṣo yájadhyai //

3.6.3.4

pracodáyantā vidátheṣu kārū́ /
prācī́naṃ jyótiḥ pradíśā diśántā /
ā́ no yajñáṃ bhā́ratī tū́yam etu /
íḍā manuṣvád ihá cetáyantī /
tisró devī́r barhír ā́_idám̐ syonám /
sárasvatīḥ svápasaḥ sadantu /
yá imé dyā́vāpṛthivī́ jánitrī /
rūpáir ápim̐śad bhúvanāni víśvā /
tám adyá hotar iṣitó yájīyān /
deváṃ tváṣṭāram ihá yakṣi vidvā́n //

3.6.3.5

upā́vasṛjat tmányā samañjan /
devā́nāṃ pā́tha ṛtuthā́ havī́m̐ṣi /
vánaspátiḥ śamitā́ devó agníḥ /
svádantu havyáṃ mádhunā ghṛténa /
sadyó jātó vyàmimīta yajñám /
agnír devā́nām abhavat purogā́ḥ /
asyá hótuḥ pradíśy ṛtásya vācí /
svā́hākṛtam̐ havír adantu devā́ḥ //

Commentaries (4)

Linked texts (2)