Pramāṇa · Search · About · API

Taittiriyabrahmana 3.7.1

Taittirīyabrāhmaṇa 3.7.1

Language
Sanskrit

3.7.1.1

sárvān vā́ eṣò 'gnáu kā́mān práveśayati /
yò 'gnī́n anvādhā́ya vratám upáiti /
sá yád ániṣṭvā prayāyā́t /
ákāmaprītā enaṃ kā́mā nā́nu práyāyuḥ /
atejā́ avīryàḥ syāt /
sá juhuyāt /
túbhyaṃ tā́ /
víśvāḥ sukṣitáyaḥ pṛ́thak /
ágne kā́māya yemira íti /
kā́mān evā́smin dadhāti //

3.7.1.2

kā́maprītā enaṃ kā́mā ánu práyānti /
tejasvī́ vīryā̀vān bhavati /
sáṃtatir vā́ eṣā́ yajñásya /
yò 'gnī́n anvādhā́ya vratám upáiti /
sá yád udvā́yati /
vícchittir evā́sya sā́ /
táṃ prā́ñcam uddhṛ́tya /
mánasā_úpatiṣṭheta /
máno vái prajā́patiḥ /
prājāpatyó yajñáḥ //

3.7.1.3

mánasā_evá yajñám̐ sáṃtanoti /
bhū́r íty āha /
bhūtó vái prajā́patiḥ /
bhū́tim evá_upaiti /
ví vā́ eṣá indriyéṇa vīryèṇa_ṛdhyate /
yásya_ā́hitāgner agnír apakṣā́yati /
yā́vat_śámyayā pravídhyet /
yádi tā́vad apakṣā́yet /
tám̐ sáṃbharet /
idáṃ ta ékaṃ pará uta ékam //

3.7.1.4

tṛtī́yena jyótiṣā sáṃviśasva /
saṃvéśanas tanúvai cā́rur edhi /
priyé devā́nāṃ paramé janítra íti /
bráhmaṇā_eváinam̐ sáṃbharati /
sā́_evá tátaḥ prā́yaścittiḥ /
yádi parastarā́m apakṣā́yet /
anuprayā́yā́vasyet /
só evá tátaḥ prā́yaścittiḥ /
óṣadhīr vā́ etásya paśū́n páyaḥ práviśati /
yásya havíṣe vatsā́ apā́kṛtā dháyanti //

3.7.1.5

tā́n yád duhyā́t /
yātáyāmnā havíṣā yajeta /
yán ná duhyā́t /
yajñaparúr antáriyāt /
vāyavyā̀ṃ yavāgū́ṃ nírvapet /
vāyúr vái páyasaḥ pradāpayitā́ /
sá evā́smai páyaḥ prádāpayati /
páyo vā́ óṣadhayaḥ /
páyaḥ páyaḥ /
páyasā_evā́smai páyó 'varundhe //

3.7.1.6

átha_úttarasmai havíṣe vatsā́n apā́kuryāt /
sā́_evá tátaḥ prā́yaścittiḥ /
anyatarā́n vā́ eṣá devā́n bhāgadhéyena vyàrdhayati /
yé yájamānasya sāyáṃ gṛhám āgácchanti /
yásya sāyaṃdugdhám̐ havír ā́rtim ārccháti /
índrāya vrīhī́n nirúpya_úpavaset /
páyo vā́ óṣadhayaḥ /
páya evá_ārábhya gṛhītvā́_upavasati /
yát prātáḥ syā́t /
tát_śṛtáṃ kuryāt //

3.7.1.7

átha_ítara aindráḥ puroḍā́śaḥ syāt /
indriyé evā́smai samī́cī dadhāti /
páyo vā́ óṣadhayaḥ /
páyaḥ páyaḥ /
páyasā_evā́smai páyó 'varundhe /
átha_úttarasmai havíṣe vatsā́n apā́kuryāt /
sā́_evá tátaḥ prā́yaścittiḥ /
ubháyān vā́ eṣá devā́n bhāgadhéyena vyàrdhayati /
yé yájamānasya sāyáṃ ca prātáś ca gṛhám āgácchanti /
yásya_ubháyam̐ havír ā́rtim ārcháti //

3.7.1.8

aindráṃ páñcaśarāvam odanáṃ nírvapet /
agníṃ devátānāṃ prathamáṃ yajet /
agnímukhā evá devátāḥ prīṇāti /
agníṃ vā́ anv anyā́ devátāḥ /
índram ánv anyā́ḥ /
tā́ evá_ubháyīḥ prīṇāti /
páyo vā́ óṣadhayaḥ /
páyaḥ páyaḥ /
páyasā_evā́smai páyó 'varundhe /
átha_úttarasmai havíṣe vatsā́n apā́kuryāt //

3.7.1.9

sā́_evá tátaḥ prā́yaścittiḥ /
ardhó vā́ etásya yajñásya mīyate /
yásya vrátyé 'han pátny anālambhukā́ bhávati /
tā́m aparúdhya yajeta /
sárveṇa_evá yajñéna yajate /
tā́m iṣṭvā́_upahvayeta /
ámū hám asmi /
sā́ tvám /
dyáur ahám /
pṛthivī́ tvám /
sā́māhám /
ṛ́k tvám /
tā́v éhi sáṃbhavāva /
sahá réto dadhāvahai /
pum̐sé putrā́ya véttavai /
rāyás póṣāya suprajāstvā́ya suvī́ryāya_íti /
ardhá evá_enām úpahvayate /
sā́_evá tátaḥ prā́yaścittiḥ //

Commentaries (1)

Linked texts (1)