Taittiriyabrahmana 3.7.11
Taittirīyabrāhmaṇa 3.7.11
- Language
- Sanskrit
3.7.11.1
bráhma pratiṣṭhā́ mánaso bráhma vācáḥ /
bráhma yajñā́nām̐ havíṣām ā́jyasya /
átiriktaṃ kármaṇo yác ca hīnám /
yajñáḥ párvāṇi pratiránn eti kalpáyan /
svā́hākṛtā_ā́hutir etu devā́n /
ā́śrāvitam atyā́śrāvitam /
váṣaṭkṛtam atyánūktaṃ ca yajñé /
átiriktaṃ karmaṇó yác ca hīnám /
yajñáḥ párvāṇi pratiránn eti kalpáyan /
svā́hākṛtā_ā́hutir etu devā́n //
3.7.11.2
yád vo devā atipādáyāni /
vācā́ cit práyataṃ devahéḍanam /
arāyó asmā́m̐ abhí ducchunāyáte /
anyátrāsmán marutas tán nídhetana /
tatáṃ ma ā́pas tád u tāyate púnaḥ /
svā́diṣṭhā dhītír ucáthāya śasyate /
ayám̐ samudrá utá viśvábheṣajaḥ /
svā́hākṛtasya sám u tṛpṇuta_ṛbhuvaḥ /
úd vayáṃ támasas pári, /
úd u tyáṃ, citrám, //
3.7.11.3
imáṃ me varuṇa, tát tvā yāmi, /
tváṃ no ágne, sá tváṃ no agne, /
tvám agne ayā́_asi, prájāpate, /
imáṃ jīvébhyaḥ paridhíṃ dadhāmi /
mā́_eṣā́ṃ nu gād áparo árdham etám /
śatáṃ jīvantu śarádaḥ purūcī́ḥ /
tiró mṛtyúṃ dadhatāṃ párvatena /
iṣṭébhyaḥ svā́hā váṣaḍ ániṣṭebhyaḥ svā́hā /
bheṣajáṃ dúriṣṭyai svā́hā níṣkṛtyai svā́hā /
dáurārddhyai svā́hā dáivībhyas tanū́bhyaḥ svā́hā //
3.7.11.4
ṛ́ddhyai svā́hā sámṛddhyai svā́hā /
yáta indra bháyāmahe /
táto no ábhayaṃ kṛdhi /
mághavan _śagdhí táva tán na ūtáye /
ví dvíṣo ví mṛ́dho jahi /
svastidā́ viśás pátiḥ /
vṛtrahā́ vímṛ́dho vaśī́ /
vṛ́ṣā_índraḥ purá etu naḥ /
svastidā́ abhayaṃkaráḥ /
ābhír gīrbhír yád áto na ūnám //
3.7.11.5
ā́pyāyaya harivo várdhamānaḥ /
yadā́ stotṛ́bhyo máhi gotrā́ rujā́si /
bhūyiṣṭhabhā́jo ádha te syāma /
ánājñātaṃ yád ā́jñātam /
yajñásya kriyáte míthu /
ágne tád asya kalpaya /
tvám̐ hí véttha yathātathám /
púruṣasaṃmito yajñáḥ /
yajñáḥ púruṣasaṃmitaḥ /
ágne tád asya kalpaya /
tvám̐ hí véttha yathātathám /
yát pākatrā́ mánasā dīnádakṣā ná /
yajñásya manváte mártāsaḥ /
agníṣ ṭad dhótā kratuvíd vijānán /
yájiṣṭho devā́m̐ ṛtuśó yajāti //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit