Pramāṇa · Search · About · API

Taittiriyabrahmana 3.7.9

Taittirīyabrāhmaṇa 3.7.9

Language
Sanskrit

3.7.9.1

anāgásas tvā vayám /
índreṇa préṣitā úpa /
vāyúṣ ṭe astv am̐śabhū́ḥ /
mitrás te astv am̐śabhū́ḥ /
váruṇas te astv am̐śabhū́ḥ /
ápāṃ kṣayā ṛ́tasya garbhāḥ /
bhúvanasya gopāḥ śyénā atithayaḥ /
párvatānāṃ kakubhaḥ prayúto napātāraḥ /
vagnúnā_índram̐ hvayata /
ghóṣeṇā́mīvām̐ś cātayata //

3.7.9.2

yuktā́ḥ stha váhata /
devā́ grā́vāṇa índur índra íty avādiṣuḥ /
ā́_índram acucyavuḥ paramásyāḥ parāvátaḥ /
ā́_asmā́t sadhásthāt /
ā́_urór antárikṣāt /
ā́ subhūtám asuṣavuḥ /
brahmavarcasáṃ ma ā́suṣavuḥ /
samaré rákṣām̐sy avadhiṣuḥ /
ápahataṃ brahmajyásya /
vā́k ca tvā mánaś ca śriṇītām //

3.7.9.3

prāṇáś ca tvā_apānáś ca śrīṇītām /
cákṣuś ca tvā śrótraṃ ca śrīṇītām /
dákṣaś ca tvā bálaṃ ca śrīṇītām /
ójaś ca tvā sáhaś ca śrīṇītām /
ā́yuś ca tvā jarā́ ca śrīṇītām /
ātmā́ ca tvā tanū́ś ca śrīṇītām /
śṛtò 'si śṛtáṃkṛtaḥ /
śṛtā́ya tvā śṛtébhyas tvā /
yám índram āhúr váruṇaṃ yám āhúḥ /
yáṃ mitrám āhúr yám u satyám āhúḥ //

3.7.9.4

yó devā́nāṃ devátamas tapojā́ḥ /
tásmai tvā tébhyas tvā /
máyi tyád indriyáṃ mahát /
máyi dákṣo máyi krátuḥ /
máyi dhāyi suvī́ryam /
tríśug gharmó víbhātu me /
ā́kūtyā mánasā sahá /
virā́jā jyótiṣā sahá /
yajñéna páyasā sahá /
tásya dóham aśīmahi //

3.7.9.5

tásya sumnám aśīmahi /
tásya bhakṣám aśīmahi /
vā́g juṣāṇā́ sómasya tṛpyatu /
mitró jánān, prá sá mitra, /
yásmān ná jātáḥ páro anyó ásti /
yá āvivéśa bhúvanāni víśvā /
prajā́patiḥ prajáyā saṃvidānáḥ /
trī́ṇi jyótīm̐ṣi sacate sá ṣoḍaśī́ /
eṣá brahmā́ yá ṛtvíyaḥ /
índro nā́ma śrutó gaṇé //

3.7.9.6

prá te mahé vidáthe 'śam̐siṣam̐ hárī /
yá ṛtvíyaḥ prá te vanve /
vanúṣo haryatáṃ mádam /
índro nā́ma ghṛtáṃ ná yáḥ /
háribhiś cā́ru sécate /
śrutó gaṇá ā́ tvā viśantu /
hárivarpasaṃ gíraḥ /
índrā́dhipaté 'dhipatis tváṃ devā́nām asi /
ádhipatiṃ mā́m /
ā́yuṣmantaṃ várcasvantaṃ manuṣyèṣu kuru //

3.7.9.7

índraś ca samrā́ḍ váruṇaś ca rā́jā /
táu te bhakṣáṃ cakratur ágra etám /
táyor ánu bhakṣáṃ bhakṣayāmi /
vā́g juṣāṇā́ sómasya tṛpyatu /
prajā́patir viśvákarmā /
tásya máno deváṃ yajñéna rādhyāsam /
arthegā́ asy ájahitaḥ /
avasā́napate 'vasā́naṃ me vinda /
námo rudrā́ya vāstoṣpátaye /
ā́yane vidrávaṇe //

3.7.9.8

udyā́ne yát parā́yaṇe /
āvártane vivártane /
yó gopāyáti tám̐ huve /
yā́ny apāmítyāny ápratīttāny ásmi /
yamásya balínā carāmi /
ihá_evá sántaḥ práti tád yātayāmaḥ /
jīvā́ jīvébhyo níharāma enat /
anṛṇā́ asmínn anṛṇā́ḥ párasmin /
tṛtī́ye loké anṛṇā́ḥ syāma /
yé devayā́nā utá pitṛyā́ṇāḥ //

3.7.9.9

sárvān pathó anṛṇā́ ā́kṣīyema /
idám ū nú śréyo 'vasā́nam ā́ganma /
śivé no dyā́vāpṛthivī́ ubhé imé /
gómad dhánavad áśvavad ū́rjasvat /
suvī́rā vīráir ánu sáṃcarema /
arkáḥ pavítram̐ rájaso vimā́naḥ /
punā́ti devā́nāṃ bhúvanāni víśvā /
dyā́vāpṛthivī́ páyasā saṃvidāné /
ghṛtáṃ duhāte amṛ́taṃ prápīne /
pavítram arkó rájaso vimā́naḥ /
punā́ti devā́nāṃ bhúvanāni víśvā /
súvar jyótir yáśo mahát /
aśīmáhi gādhám utá pratiṣṭhā́m //

Commentaries (1)

Linked texts (3)