Taittiriyabrahmana 3.9.21
Taittirīyabrāhmaṇa 3.9.21
- Language
- Sanskrit
3.9.21.1
ādityā́ś cā́ṅgirasaś ca suvargé lokè 'spardhanta /
té 'ṅgirasa ādityébhyaḥ /
amúm ādityámaśvam̐ śvetáṃ bhūtáṃ dákṣiṇām anayan /
tè 'bruvan /
yáṃ nó 'neṣṭa /
sá váryo 'bhūd íti /
tásmād áśvam̐ sávarya_ity ā́hvayanti /
tásmād yajñé váro dīyate //
yát prajā́patir ā́labdhó 'śvó 'bhavat /
tásmād áśvo nā́ma //
3.9.21.2
yát_śváyad árur ā́sīt /
tásmād árvā nā́ma //
yát sadyó vā́jant samájayat /
tásmād vājī́ nā́ma /
yád ásurāṇāṃ lokā́n ā́datta /
tásmād ādityó nā́ma //
agnírvā́ aśvamedhásya yónir āyátanam /
sū́ryo 'gnér yónir āyátanam /
yád aśvamedhè 'gnáu cítya uttaravedím upavápati /
yónimantam eváinam āyátanavantaṃ karoti //
3.9.21.3
yónimān āyátanavān bhavati /
yá eváṃ véda //
prāṇāpānáu vā́ etáu devā́nām /
yád arkāśvamedháu /
prāṇāpānā́v evā́varundhe //
ójo bálaṃ vā́ etáu devā́nām /
yád arkāśvamedháu /
ójo bálam evā́varundhe //
agnír vā́ aśvamedhásya yónir āyátanam /
sū́ryo 'gnér yónir āyátanam /
yád aśvamedhè 'gnáu cítya uttaravedíṃ cinóti /
tā́v arkāśvamedháu /
arkāśvamedhā́v evā́varundhe /
átho arkāśvamedháyor evá prátitiṣṭhati //
Commentaries (5)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Yajurbrahmaṇabhāṣya — Sāyaṇācārya, Sanskrit
Discussed in (2)
- Original Sanskrit Texts on the Origin and History of the People of India, their Religion and Institutions — Muir 1858, English
- Altindische Grammatik — Wackernagel & Debrunner 1896, German