Pramāṇa · Search · About · API

Taittiriyabrahmana 3.9.7

Taittirīyabrāhmaṇa 3.9.7

Language
Sanskrit

3.9.7.1

ápa vā́ etásmāt_śrī́ rāṣṭráṃ krāmati /
yò 'śvamedhéna yájate /
ūrdhvā́m enām úcchrayatād íty āha /
śrī́r vái rāṣṭrám aśvamedháḥ /
śríyam evā́smai rāṣṭrám ūrdhvám úcchrayati //
veṇubhāráṃ girā́v iva_íty āha /
rāṣṭráṃ vái bhāráḥ /
rāṣṭrám evā́smai páryūhati //
áthāsyā mádhyam edhatām íty āha /
śrī́r vái rāṣṭrásya mádhyam /

3.9.7.2

śríyam evā́varundhe /
śīté vā́te punánn iva_íty āha /
kṣémo vái rāṣṭrásya śītó vā́taḥ /
kṣémam evā́varundhe //
yád dhariṇī́ yávam áttī́ty āha /
víḍ vái hariṇī́ /
rāṣṭráṃ yávaḥ /
víśaṃ ca_evā́smai rāṣṭráṃ ca samī́cī dadhāti //
ná puṣṭáṃ paśú manyata íty āha /
tásmād rā́jā paśū́n ná púṣyati //

3.9.7.3

śūdrā́ yád áryajārā ná póṣāya dhanāyatī́ty āha /
tásmād váiśīpūtráṃ nā́bhíṣiñcante //
iyáṃ yakā́ śakuntikā_íty āha /
víḍ vái śakuntikā́ /
rāṣṭrám aśvamedháḥ /
víśaṃ ca_evā́smai /
rāṣṭráṃ ca samī́cī dadhāti //
āhálam íti sárpatī́ty āha /
tásmād rāṣṭrā́ya víśaḥ sarpanti //
ā́hataṃ gabhé pása íty āha /
víḍ vái gábhaḥ /

3.9.7.4

rāṣṭráṃ pásaḥ /
rāṣṭrám evá viśy ā́hanti /
tásmād rāṣṭráṃ víśaṃ ghā́tukam //
mātā́ ca te pitā́ ca ta íty āha /
iyáṃ vái mātā /
asáu pitā́ /
ābhyā́m eváinaṃ páridadāti //
ágraṃ vṛkṣásya rohata íty āha /
śrī́r vái vṛkṣásyā́gram /
śríyam evā́varundhe //

3.9.7.5

prásulāmī́ti té pitā́ gabhé muṣṭím atam̐sayad íty āha /
víḍ vái gábhaḥ /
rāṣṭráṃ muṣṭíḥ /
rāṣṭrám evá viśy ā́hanti /
tásmād rāṣṭráṃ víśa ghā́tukam //
ápa vā́ etébhyaḥ prāṇā́ḥ krāmanti /
yé yajñé 'pūtaṃ vadanti /
dadhikrā́vṇo akāriṣam íti surabhimátīm ṛ́caṃ vadanti /
prāṇā́ vái surabháyaḥ /
prāṇā́n evá_ātmán dadhate /
ná_ebhyaḥ prāṇā́ ápakrāmanti //
ā́po hí ṣṭhā́ mayobhúva íty adbhír mārjayante /
ā́po vái sárvā devátāḥ /
devátābhir evá_ātmā́naṃ pavayante //

Commentaries (4)

Linked texts (5)